ഡെറാഡൂണ്: സാറ്റലൈറ്റ് ഫോണ് കൈവശം വച്ചതിന് മുന് റഷ്യന് മന്ത്രി വിക്ടര് സെമെനോവ് അറസ്റ്റില്. ഉത്തരാഖണ്ഡിലെ ഡെറാഡൂണ് വിമാനത്താവളത്തില് വച്ചാണ് ഇയാള് അറസ്റ്റിലായത്.
മുന്കൂര് അനുമതി വാങ്ങാതെ സാറ്റലൈറ്റ് ഫോണുകള് ഉപയോഗിക്കുന്നത് രാജ്യത്ത് നിയമവിരുദ്ധമാണ്. ഇത് കൈവശം വയ്ക്കാനാവശ്യമായ രേഖകള് ഇയാളുടെ പക്കല് ഇല്ലാത്തതിനാലാണ് കസ്റ്റഡിയിലെടുത്തതെന്ന് പോലീസ് അറിയിച്ചു. അടിയന്തര ഘട്ടത്തില് വ്യക്തിപരമായ ആവശ്യങ്ങള്ക്ക് ഉപയോഗിക്കാനായി കൈയില് കരുതിയതാണ് ഇതെന്ന് ഇയാള് പോലീസിനോട് പറഞ്ഞു.
1998 മുതല് ഒരുവര്ഷത്തോളം റഷ്യയുടെ ഭക്ഷ്യ-കൃഷി വകുപ്പ് മന്ത്രിയായിരുന്നു അറസ്റ്റിലായ സെമെനോവ്. ഡെറാഡൂണില് നിന്ന് ഡല്ഹിയിലേക്ക് പോകാനെത്തിയപ്പോഴാണ് സെന്ട്രല് ഇന്ഡസ്ട്രിയല് സെക്യൂരിറ്റി ഫോഴ്സ് ഇയാളെ കസ്റ്റഡിയിലെടുത്തത്.