തൃശൂര്‍; അതിരപ്പിള്ളി-മലക്കപ്പാറ റൂട്ടില്‍ വീണ്ടും കബാലി എന്ന കാട്ടാനയിറങ്ങി. ചാലക്കുടിയില്‍ നിന്ന് മലക്കപ്പാറയിലേക്ക് പോയ കെഎസ്ആര്‍ടിസി ബസിനു നേരെയായിരുന്നു ആക്രമണം.
ബുധനാഴ്ച വൈകിട്ട് 8 നാണ് സംഭവം. വാഹനത്തിനു നേരെ പാഞ്ഞടുത്ത കാട്ടാന ബസിനെ കൊമ്പില്‍ കുത്തി ഉയര്‍ത്തി താഴെ വയ്ക്കുകയായിരുന്നു. രണ്ടുമണിക്കൂറിലേറെ ആന ബസിനു മുന്നില്‍ നിലയുറപ്പിച്ച് പരിഭ്രാന്തി പരത്തി.
എട്ടരയോടെ മലക്കപ്പാറ എത്തേണ്ട ബസ് രാത്രി പതിനൊന്നിനാണ് ഇവിടെയെത്തിയത്.
കഴിഞ്ഞയാഴ്ച സ്വകാര്യ ബസിനു നേരെയും കബാലിയുടെ ആക്രമണമുണ്ടായിരുന്നു. ആന വാഹനത്തിനു നേരെ പാഞ്ഞടുത്തതോടെ എട്ട് കിലോമീറ്ററോളം ബസ് പിന്നോട്ടെടുത്താണ് രക്ഷപെട്ടത്.
