ചെന്നൈ: മാന്നാർ കടലിടുക്കിൽ നാവികസേന നടത്തിയ വെടിവയ്പ്പിൽ തമിഴ്നാട് സ്വദേശിയായ മത്സ്യത്തൊഴിലാളിക്ക് പരിക്കേറ്റു. മയിലാടുത്തുറൈ സ്വദേശിയായ കെ.വീരവേലിനാണ്(30) പരിക്കേറ്റത്.
ഉച്ചിപുലി നാവികത്താവളത്തിൽ നിന്ന് കടലിൽ റോന്ത് ചുറ്റാനിറങ്ങിയ തീരസുരക്ഷാ ചുമതലയുള്ള കപ്പലിൽ നിന്നാണ് വീരവേലിന് വെടിയേറ്റത്. മത്സ്യത്തൊഴിലാളികൾ സഞ്ചരിച്ച യാനം മുന്നറിയിപ്പ് ലഭിച്ചിട്ടും പരിശോധനയ്ക്കായി നിർത്താതെ യാത്ര തുടർന്നതോടെയാണ് സേനാംഗങ്ങൾ വെടിയുതിർത്തത്.
പൂംപൂഹാർ പ്രദേശത്തെ വനഗിരി ഗ്രാമത്തിൽ നിന്നുള്ള വീരവേൽ രാമനാഥപുരം മെഡിക്കൽ കോളജിൽ ചികിത്സയിൽ തുടരുകയാണ്.