കോഴിക്കോട്: മാതാവ് ഓടിച്ച കാര്‍ നിയന്ത്രണം വിട്ട് വീടിൻ്റെ ഉമ്മറത്തേക്ക് ഇടിച്ചു കയറി മകള്‍ക്ക് ദാരുണാന്ത്യം. ഈങ്ങാപ്പുഴ പടിഞ്ഞാറെ മലയില്‍ നസീറിന്റെയും ലുബ്ന ഫെബിനിൻ്റെയും മകള്‍ മൂന്നര വയസുകാരി മറിയം നസീര്‍ ആണ് മരിച്ചത്. കൊടുവള്ളിക്കടുത്ത് നെല്ലാംങ്കണ്ടി ആലപ്പുറായിൽ ഉമ്മയുടെ വീട്ടുമുറ്റത്ത് വെച്ചാണ് അപകടം.
തിരിച്ചിടുന്നതിനായി ലുബ്ന മുന്നോട്ടെടുത്ത കാര്‍ നിയന്ത്രണം വിട്ട് പടിയിലിരിക്കുകയായിരുന്ന മകളുടെ ദേഹത്ത് ഇടിക്കുകയായിരുന്നു. അപകടം നടന്നയുടന്‍ തന്നെ കുട്ടിയെ കൊടുവള്ളിയിലെ സ്വകാര്യ ആശുപത്രിയിലെത്തിച്ചു. തുടർന്ന് വിദഗ്ധ ചികിത്സക്കായി കോഴിക്കോട്ടെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല.
പിതാവ് നസീർ വിദേശത്താണ്. അപകടവിവരമറിഞ്ഞ് ഇദ്ദേഹം നാട്ടിലേക്ക് തിരിച്ചിട്ടുണ്ട്. കോഴിക്കോട് മെഡിക്കല്‍ കോളേജ് മോർച്ചറിയിലേക്കു മാറ്റിയ മൃതദേഹം നടപടികള്‍ പൂര്‍ത്തിയാക്കി ബന്ധുക്കള്‍ക്ക് വിട്ടുനല്‍കും.നാളെ ഈങ്ങാപ്പുഴ ടൗണ്‍ ജുമാമസ്ജിദ് ഖബര്‍സ്ഥാനില്‍ ഖബറടക്കും.
യാരിസ് ആണ് മരിച്ച മറിയത്തിൻ്റെ സഹോദരൻ.
