ന്യൂഡല്‍ഹി: നിരോധിത സംഘടനയായ ജമാഅത്തെ ഇസ്‌ലാമിയുടെ മുൻനിര സ്ഥാപനമായി പ്രവർത്തിക്കുന്ന അൽ-ഹുദ എജ്യുക്കേഷണൽ ട്രസ്റ്റുമായി ബന്ധപ്പെട്ട തീവ്രവാദ ഫണ്ടിംഗ് കേസിൽ ദേശീയ അന്വേഷണ ഏജൻസി (എൻഐഎ) ജമ്മു കശ്മീരിലെ വിവിധ ഇടങ്ങളിൽ റെയ്ഡ് നടത്തുന്നു. രജൗരി, പൂഞ്ച്, ജമ്മു, ശ്രീനഗർ, പുൽവാമ, ബുദ്ഗാം, ഷോപിയാൻ, ബന്ദിപോറ ജില്ലകളിലെ ഒന്നിലധികം സ്ഥലങ്ങളിൽ എൻഐഎ പരിശോധന നടത്തുന്നുണ്ട്.  

ജമ്മു കശ്മീരിലെ രജൗരിയിലുള്ള അൽ-ഹുദാ വിദ്യാഭ്യാസ ട്രസ്റ്റിന്റെ “സംശയാസ്‌പദമായ പ്രവർത്തനങ്ങളുമായി” ബന്ധപ്പെട്ടതാണ് കേസ്. ജമാഅത്തെ ഇസ്‌ലാമിയുമായി ബന്ധപ്പെട്ട അൽ-ഹുദ എജ്യുക്കേഷണൽ ട്രസ്റ്റിന്റെ ഫണ്ടിംഗ് രീതികളുടെയും പ്രവർത്തനങ്ങളുടെയും അടിസ്ഥാനത്തിൽ കേന്ദ്ര ഏജൻസി സ്വമേധയാ കേസെടുക്കുകയായിരുന്നു.

2019 മാർച്ചിൽ കേന്ദ്ര സർക്കാർ ജമാഅത്തെ ഇസ്‌ലാമിയെ അഞ്ച് വർഷത്തേക്ക് നിരോധിച്ചിരുന്നു. സാമൂഹിക-രാഷ്ട്രീയ-മത സംഘടനയായ ഇവർ ചില തീവ്രവാദ സംഘടനകളുമായി അടുത്ത ബന്ധം പുലർത്തുന്നുവെന്ന കാരണങ്ങൾ ചൂണ്ടിക്കാട്ടിയായിരുന്നു നടപടി.

കഴിഞ്ഞ മാസം, കശ്മീർ പോലീസിന്റെ സംസ്ഥാന അന്വേഷണ ഏജൻസി (എസ്‌ഐ‌എ) നിരോധിത ഗ്രൂപ്പായ ജമാഅത്തെ ഇസ്‌ലാമിയുടെയും അതിന്റെ അനുബന്ധ സംഘടനയായ ഫലാ-ഇ-ആം ട്രസ്റ്റിന്റെയും (എഫ്എടി) കേന്ദ്രങ്ങളിൽ റെയ്ഡ് നടത്തിയിരുന്നു. പരിശോധനയിൽ, ജമാഅത്തെ ഇസ്ലാമിക്കെതിരായ കേസുമായി ബന്ധപ്പെട്ട ലാപ്‌ടോപ്പുകൾ, ക്യാഷ് ബുക്കുകൾ, ചെക്ക് ബുക്കുകൾ, ഭൂമി രേഖകൾ എന്നിവയുൾപ്പെടെ പിടിച്ചെടുത്തിരുന്നു. ഇതിന് പിന്നാലെയാണ് എൻഐഎ നടപടിയും ഉണ്ടായിരിക്കുന്നത്.