പ്രകൃതി മനോഹരവും ശാന്തസുന്ദരവുമായ യു.എ.ഇയിലെ പ്രദേശമാണ് കല്ബ. ഷാര്ജ എമിറേറ്റിന്റെ ഭാഗമായ ഇവിടം വികസിച്ചുവരുന്ന ഇക്കോടൂറിസത്തിന്റെ രാജ്യത്തെ ഏറ്റവും ആകര്ഷകമായ സ്ഥലമാണ്.
യു.എ.ഇയുടെ ദേശീയ മൃഗമായ അറേബ്യന് ഓറിക്സിനെ കാണാന് ഇവിടെയെത്തുന്നവരുണ്ട്. അതുപോലെ ബൈത്ത് ശൈഖ് സയീദ് ബിന് ഹമദ് അല് ഖാസിമി മ്യൂസിയം, പുനര്നിര്മിച്ച കോട്ട തുടങ്ങിയവയും ഇവിടുത്തെ ശ്രദ്ധേയമായ കേന്ദ്രങ്ങളാണ്. വന്യജീവി-പൈതൃക പ്രേമികള് സന്ദര്ശിക്കേണ്ട വിനോദസഞ്ചാര കേന്ദ്രമായ ഇവിടെ ട്രക്കിങ്, കയാക്കിങ്, സ്കൂബ ഡൈവിങ് എന്നിവക്കും സൗകര്യമുണ്ട്.
എന്നാല് ശാന്തവും സുന്ദരവുമായ ഇവിടുത്തെ കടല്തീരമാണ് ഏറ്റവും ആകര്ഷകം. 9കിലോമീറ്ററിലധികം വിസ്തൃതിയുള്ള കല്ബ ബീച്ചില് വേനല്കാലത്ത് നിരവധി സഞ്ചാരികളാണ് വന്നുചേരുന്നത്. വന്യജീവികള് നിറഞ്ഞ കണ്ടല്ക്കാടായ ഖോര് കല്ബ കണ്സര്വേഷന് റിസര്വിന് തൊട്ടപ്പുറത്താണ് ബീച്ച് സ്ഥിതി ചെയ്യുന്നത്. അപൂര്വ ജീവികള് എത്തിച്ചേരുന്ന ഇവിടം ഹോക്സ്ബില് ആമകളുടെ ഒരു പ്രധാന കൂടുകെട്ടല് കേന്ദ്രമാണ്.
വംശനാശഭീഷണി നേരിടുന്ന അറേബ്യന് കോളര് കിംങ്ഫിഷര് പക്ഷികളുടെ യു.എ.ഇയിലെ ഏക പ്രജനന കേന്ദ്രം കൂടിയാണ് കല്ബ റിസര്വ്. ഇതിന് സമീപത്തെ ബീച്ച് ഭാഗം മല്സ്യബന്ധ പ്രദേശമായതിനാല് ധാരാളം പ്രദേശിക മല്സ്യത്തൊഴിലാളികളെയും അവരുടെ പ്രവര്ത്തനങ്ങളും കാണാനാകും. കുട്ടികള്ക്കും മുതിര്ന്നവര്ക്കും ആസ്വാദ്യകരമായ സ്കൂബ ഡൈവിങ് ഇവിടെയെത്തുന്നവര്ക്ക് ആസ്വദ്യകരമാണ്. ഷാര്ജയിലെ മറ്റ് വിനോദസഞ്ചാര കേന്ദ്രങ്ങളില് നിന്ന് വ്യത്യസ്തമായി തിരക്ക് കുറഞ്ഞ സ്ഥലം കൂടിയാണിത്.
ആഴം കുറഞ്ഞ കടലിന്റെ തീരത്തോടടുത്ത ഭാഗത്തെ തിളക്കമുള്ള വെള്ളം ഏതൊരാളെയും ഇറങ്ങിക്കുളിക്കാന് കൊതിപ്പിക്കുന്നതാണ്. ബീച്ചില് സ്വസ്ഥമായി കുളിക്കാന് എത്തുന്നവര്ക്ക് എല്ലാ സൗകര്യങ്ങളും അധികൃതര് ഒരുക്കിയിട്ടുണ്ട്. സദാസമയവും ജാഗരൂകരായ ലൈഫ് ഗാര്ഡുമാരും സുരക്ഷാ ജീവനക്കാരും ഇവിടെയുണ്ട്. ആഴം കുറഞ്ഞ ഭാഗങ്ങള് അടയാളപ്പെടുത്തുകയും അതിരുകളില് സുരക്ഷാ സംവിധാനങ്ങള് ഒരുക്കുകയും ചെയ്തിട്ടുണ്ട്.
വലിയ സംവിധാനങ്ങളോടെ രൂപപ്പെടുത്തിയ കല്ബ ബീച്ച് കോര്ണിഷ് കഴിഞ്ഞ വര്ഷമാണ് സുപ്രീം കൗണ്സില് അംഗവും ഷാര്ജ ഭരണാധികാരിയുമായ ശൈഖ് ഡോ. സുല്ത്താന് ബിന് മുഹമ്മദ് അല് ഖാസിമി ഉദ്ഘാടനം ചെയ്തത്. വിനോദസഞ്ചാരികള്ക്ക് ഏറ്റവും മികച്ച സൗകര്യങ്ങളൊരുക്കുന്നതിന്റെ ഭാഗമായാണ് കോര്ണിഷ് വിപുലീകരിച്ചത്. കോര്ണിഷിന് മനോഹാരിത പകര്ന്ന് നൂറുക്കണക്കിന് ഈത്തപ്പനകള് തീരത്ത് നട്ടുപിടിപ്പിച്ചിട്ടണ്ട്. ഇതടങ്ങുന്ന ഭാഗം പച്ചപ്പുല് വിരിച്ച് പാര്ക്കായി രൂപപ്പെടുത്തിയത് കുട്ടികള്ക്കും മുതിര്ന്നവര്ക്കും വിനോദങ്ങളിലേര്പ്പെടാന് സൗകര്യമാണ്. കുട്ടികള്ക്ക് പ്രത്യേകമായ മറ്റു വിനോദ സൗകര്യങ്ങളുമുണ്ട്. ഒരു സര്വീസ് റോഡിന് പുറമേ കോര്ണിഷ് റോഡിലേക്ക് ഒരു അധിക പാത, 3,000 കാറുകള് പാര്ക്ക് ചെയ്യാന് സൗകര്യം എന്നിവയുമുണ്ട്.
പാര്ക്കിങില് 82 എണ്ണം നിശ്ചയദാര്ഢ്യ വിഭാഗക്കാര്ക്ക് സംവരണം ചെയ്തിട്ടുമുണ്ട്. കോര്ണിഷില് 7.6 കിലോമീറ്റര് നീളവും 4 മീറ്റര് വീതിയുമുള്ള റണ്ണിങ് ട്രാക്കും കടലിനഭിമുഖമായി ഇരിക്കുന്നതിന് ബെഞ്ചുകളും ഉണ്ട്. വേനല്കാലത്തെ ഒഴിവുദിനങ്ങള് ആസ്വദ്യകരമാക്കാന് കുടുംബങ്ങള്ക്കും സുഹൃദ്വൃന്ദങ്ങള്ക്കും ഏറ്റവും അനുയോജ്യമായൊരിടമാണിത്