പാരീസ്: ലോകപ്രശസ്ത ഫാഷൻ ഡിസൈനർ വിർജിൽ അബ്ലോ അന്തരിച്ചു. വിഖ്യാതമായ ലൂയി വിറ്റന്‍റെ ആർട്ടിസ്റ്റിക് ഡയറക്ടറും ഓഫ് വൈറ്റ് എന്ന ബ്രാൻഡിന്‍റെ സ്ഥാപകനുമാണ് ഈ 41 കാരൻ.
ഞായറാഴ്ചയായിരുന്നു വിർജിൽ അബ്ലോയുടെ അന്ത്യമെന്ന് ലൂയി വിറ്റന്‍റെ ഉടമസ്ഥരായ എൽവിഎംഎച്ച് അറിയിച്ചു. ലോകത്തിന്‍റെ ഫാഷൻ തലസ്ഥാനമായ പാരീസിൽ പ്രവർത്തിക്കുന്ന ലൂയി വിറ്റന്‍റെ ക്രിയേറ്റീവ് ഡയറക്ടർ പദവിയിലെത്തുന്ന ആദ്യ കറുത്ത വർഗക്കാരനാണ് വിർജിൽ അബ്ലോ.
രണ്ടുവർഷം മുന്പാണ് പ്രതിഭാധനനായ ഈ കലാകാരന് അപൂർവമായ കാർഡിയാക് ആൻജിയോ സാർകോമ എന്ന കാൻസർ സ്ഥിരീകരിച്ചത്. ഇക്കാര്യം രഹസ്യമാക്കിവെച്ച് അദ്ദേഹം കർമനിരതനാവുകയായിരുന്നു. കലാ സാംസ്കാരിക, ഫാഷൻ രംഗങ്ങളിലെ തിരക്കുകൾക്കിടയിലും അതിസങ്കീർണമായ ചികിത്സകളിലൂടെ അദ്ദേഹം കടന്നു പോയിരുന്നുവെന്ും കന്പനിയുടെ അനുശോചന കുറിപ്പിൽ പറയുന്നു.
വസ്ത്രരൂപകല്പനയുടെയും അവതരണത്തിന്‍റെയും രീതികൾ അടിമുടി പരിഷ്കരിച്ച വിർജിൽ അബ്ലോയുടെ വേർപാട് ഫാഷൻ ലോകത്തിനു തീരാനഷ്ടമാണെന്നു വിലയിരുത്തപ്പെടുന്നു.
ഡിജെ, ചിത്രകാരൻ എന്ന നിലകളിലും പ്രശസ്തനാണ്. സിവിൽ എൻജിനിയറിംഗിലും ആർക്കിടെക്ചറിലും ബിരുദധാരിയായ വിർജിലിന്‍റെ മാതാപിതാക്കൾ ആഫ്രിക്കൻ രാജ്യമായ ഘാനയിൽ നിന്ന് യുഎസിലേക്ക് കുടിയേറിയവരാണ്.
