ടിനു പാപ്പച്ചന്‍-ആന്റണി വര്‍ഗീസ് ചിത്രം അജഗജാന്തരം സിനിമയുടെ ട്രെയിലര്‍ അണിയറപ്രവര്‍ത്തകര്‍ പുറത്തുവിട്ടു. ‘ആനയും അംബാരിയും അടിയും വെടിയും പൊട്ടിത്തെറിയുമുള്ള തീ പാറുന്ന പൂരം’ എന്നാണ് ട്രെയിലര്‍ പങ്കുവച്ചുകൊണ്ട് ലിജോ ജോസ് പെല്ലിശ്ശേരി സോഷ്യല്‍ മീഡിയയില്‍ ചിത്രത്തെ വിശേഷിപ്പിച്ചിരിക്കുന്നത്. ഉത്സവപറമ്പിലേക്ക് എത്തുന്ന ഒരാനയും പാപ്പാനും ഒരു കൂട്ടം യുവാക്കളും ഇവര്‍ ഒത്തുചേര്‍ന്ന ശേഷമുണ്ടാകുന്ന സംഭവ വികാസങ്ങളാണ് ചിത്രം പറയുന്നത്.

അര്‍ജുന്‍ അശോകന്‍, ജാഫര്‍ ഇടുക്കി, ചെമ്പന്‍ വിനോദ്, രാജേഷ് ശര്‍മ, സുധി കോപ്പ, വിനീത് വിശ്വം, തുടങ്ങിയ താരനിര ചിത്രത്തിലെത്തുന്നു. സില്‍വര്‍ ബേ പ്രൊഡക്ഷന്‍സിന്റെ ബാനറില്‍ എമ്മാനുവല്‍ ജോസഫും അജിത് തലാപ്പിള്ളിയും ചേര്‍ന്നാണ് ചിത്രം നിര്‍മ്മിക്കുന്നത്. കിച്ചു ടെല്ലസ്, വിനീത് വിശ്വം എന്നിവരുടേതാണ് തിരക്കഥ.