സോഫിയ: പടിഞ്ഞാറൻ ബൾഗേറിയയിൽ വിനോദയാത്രാ സംഘം സഞ്ചരിച്ച ബസ് തീപിടിച്ച് കത്തി 12 കുട്ടികൾ ഉൾപ്പെടെ 46 പേർ മരിച്ചു. വടക്കൻ മാസിഡോണിയ രജിസ്ട്രേഷനുള്ള ബസ് തുർക്കിയിലെ ഇസ്താംബൂളിൽനിന്നും മടങ്ങിവരികയായിരുന്നു.
ബൾഗേറിയൻ തലസ്ഥാനമായ സോഫിയയുടെ തെക്ക്-പടിഞ്ഞാറുള്ള മോട്ടോർവേയിലായിരുന്നു അപകടം. ക്രാഷ് ബാരിയറിൽ ഇടിച്ചുകയറിയ നിലയിലായിരുന്നു ബസ്. ബസിലുണ്ടായിരുന്ന ഏഴു പേർ രക്ഷപെട്ടു.
ഇവരെ ആശുപത്രിയിൽ പ്രവേശിപ്പിച്ചു. അപകടത്തിന്റെ കാരണം അറിവായിട്ടില്ല. ക്രാഷ് ബാരിയറിൽ ഇടിക്കുന്നതിനു മുൻപാണോ ശേഷമാണോ തീപിടിച്ചതെന്ന് മനസിലാക്കാനായിട്ടില്ല.