ന്യൂഡല്‍ഹി: പ്രശസ്ത വസ്ത്ര ബ്രാന്‍ഡായ ഫാബ് ഇന്ത്യ ‘ജശനെ റിവാസ്’ എന്ന പേരില്‍ പുറത്തിറക്കിയ വസ്ത്രശ്രേണിയുടെ പരസ്യം സംഘ്പരിവാര്‍ എതിര്‍പ്പിനെ തുടര്‍ന്ന് പിന്‍വലിച്ചു. ഉര്‍ദു ഭാഷാ പ്രേയാഗവുമായി കൂട്ടിച്ചേര്‍ത്ത് വസ്ത്രങ്ങളെ അവതരിപ്പിച്ചത് ദീപാവലി ആഘോഷത്തോടുള്ള അനാദരവാണെന്ന കര്‍ണാടകയിലെ ബി.ജെ.പി എം.പിയും യുവമോര്‍ച്ച അധ്യക്ഷനുമായ തേജസ്വി സൂര്യയുടെ ആരോപണത്തെ തുടര്‍ന്നാണ് പരസ്യം പിന്‍വലിച്ചത്.
‘ദീപാവലി ജശനെ റിവാസ് അല്ല. ഫാബ് ഇന്ത്യക്ക് അങ്ങനെ തോന്നുന്നുവെങ്കില്‍ തങ്ങള്‍ വേറെ കട നോക്കിക്കോളാം. ഹൈന്ദവ ആഘോഷങ്ങളെ അബ്രാഹ്മണവത്കരിക്കാനുള്ള നീക്കമാണ് ഇതിനു പിന്നില്‍’- എന്നായിരുന്നു സൂര്യയുടെ വിവാദ പ്രസ്താവന. മുമ്ബും പലവട്ടം കടുത്ത വര്‍ഗീയ പരാമര്‍ശങ്ങള്‍ നടത്തിയ നേതാവാണ് സൂര്യ.
‘സ്നേഹത്തിേന്‍റയും വെളിച്ചത്തിേന്‍റയും ആഘോഷത്തെ സ്വാഗതം ചെയ്യുന്ന വേളയില്‍ ഇന്ത്യന്‍ സംസ്കാരത്തിന് ‘ജശനെ റിവാസ്’ ആദരവോടെ സമര്‍പ്പിക്കുന്നു’ എന്നായിരുന്നു ഫാബ് ഇന്ത്യയുടെ പിന്‍വലിച്ച പരസ്യത്തില്‍ പറഞ്ഞിരുന്നത്. ഉത്സവച്ചടങ്ങുകള്‍/ഉത്സവാഘോഷങ്ങള്‍ എന്നല്ലാമാണ് ജശനെ റിവാസിന് അര്‍ഥമെന്നും ആ പേരില്‍ അവതരിപ്പിച്ചത് ദീപാവലി വസ്ത്രങ്ങളല്ലെന്നും ഫാബ് ഇന്ത്യ വിശദീകരിച്ചു.
ഓരോ മാസവും തങ്ങള്‍ പുതിയ വസ്ത്ര ശ്രേണി അവതരിപ്പിക്കാറുണ്ട്. ‘ജില്‍ മില്‍ സെ ദീവാലി’ എന്ന പേരില്‍ ദീപാവലി വസ്ത്രങ്ങള്‍ ഉടന്‍ പുറത്തിറങ്ങാനിരിക്കുകയാണെന്നും കമ്ബനി വ്യക്തമാക്കി.
