ഷാര്‍ജ: ഐപിഎല്‍ എലിമിനേറ്ററില്‍ ബാംഗ്ലൂര്‍ റോയല്‍ ചലഞ്ചേഴ്‌സിനെതിരേ കോല്‍ക്കത്ത നൈറ്റ് റൈഡേഴ്‌സിന് 139 റണ്‍സ് വിജയലക്ഷ്യം. ടോസ് നേടി ആദ്യം ബാറ്റ് ചെയ്ത ബാംഗ്ലൂര്‍ നിശ്ചിത ഓവറില്‍ ഏഴ് വിക്കറ്റ് നഷ്ടത്തില്‍ 138 റണ്‍സെടുത്തു.
നാല് വിക്കറ്റ് വീഴ്ത്തിയ സുനില്‍ നരെയ്നാണ് ബാംഗ്ലൂരിനെ ചെറിയ സ്കോറില്‍ ഒതുക്കുന്നതില്‍ നിര്‍ണായക പങ്ക് വഹിച്ചത്. വിരാട് കോഹ്‌ലി, ശ്രീകര്‍ ഭരത്, ഗ്ലെന്‍ മാക്സ്വെല്, ഡിവില്ലിയേഴ്സ് എന്നിവരാണ് നരെയ്ന്‍റെ ബൗളിംഗില്‍ കൂടാരം കയറിയത്.
33 പന്തില്‍ 39 റണ്‍സെടുന്ന ക്യാപ്റ്റന്‍ വിരാട് കോഹ്‌ലിയാണ് ബാംഗ്ലൂരിന്‍റെ ടോപ് സ്കോറര്‍. ഓപ്പണര്‍ ദേവദത്ത് പടിക്കല്‍ 21 റണ്‍സെടുത്തു. മാക്സ്വെല്(15), ഡിവില്ലിയേഴ്സ്(11), ഷബാസ് അഹമ്മദ്(13) എന്നിവരാണ് രണ്ടക്കം കടന്ന മറ്റ് ബാംഗ്ലൂര്‍ ബാറ്റര്‍മാര്‍.
നാലോവറില്‍ 21 റണ്‍സ് മാത്രം വിട്ടു നല്‍കിയാണ് നരെയ്ന്‍ നാല് വിക്കറ്റ് നേടിയത്. ലോക്കി ഫെര്‍ഗൂസന്‍ രണ്ട് വിക്കറ്റ് സ്വന്തമാക്കി.
