സിവില് സര്വീസ് പരീക്ഷയ്ക്കെത്തുന്ന ഉദ്യോഗാര്ത്ഥികള്ക്കായി വിപുലമായ യാത്രാസൗകര്യം ഒരുക്കി കെഎസ്ആര്ടിസി. ഒക്ടോബര് മാസം 10ന് തിരുവനന്തപുരം, കൊച്ചി, കോഴിക്കോട് എന്നിവിടങ്ങളില് നടക്കുന്ന സിവില് സര്വിസ് പരീക്ഷയെഴുതാന് എത്തുന്ന ഉദ്യോഗാര്ഥികള്ക്കായി കെ.എസ്.ആര്.ടി.സി വിപുലമായ യാത്രാസൗകര്യങ്ങള് ഒരുക്കുമെന്ന് കെഎസ്ആര്ടിസി അറിയിച്ചു.
പരീക്ഷ ദിവസവും അതിന്റെ തലേദിവസവും ആവശ്യത്തിന് വാഹന സൗകര്യം പരീക്ഷ കേന്ദ്രങ്ങള് കേന്ദ്രീകരിച്ചും റെയില്വേ സ്റ്റേഷന്, ബസ്സ്റ്റാന്ഡ് എന്നിവിടങ്ങളിലേക്ക് സര്വിസുകള് നടത്തും.
യാത്രക്കാരുടെ അമിതതിരക്ക് അനുഭവപ്പെടാന് സാധ്യതയുള്ളതിനാല് എല്ലാ പരീക്ഷ സെന്ററുകളിലേക്ക് നിലവിലുള്ള സൗകര്യങ്ങള് ഉപയോഗിച്ചും കൊവിഡ് മാനദണ്ഡങ്ങള് പാലിച്ചും ആവശ്യമായ സര്വിസുകള് നടത്താന് ബന്ധപ്പെട്ട യൂണിറ്റ് അധികാരികള്ക്ക് സി.എം.ഡി നിര്ദേശം നല്കി.