ന്യൂഡല്ഹി: രാജ്യത്ത് പ്രതിദിന കോവിഡ് രോഗികളുടെ എണ്ണം അഞ്ച് ലക്ഷമായി ഉയര്ന്നാലും നേരിടാന് തയാറെന്ന് കേന്ദ്രം. നീതി ആയോഗ് അംഗം വി.കെ.പോളാണ് ഇക്കാര്യം അറിയിച്ചത്. മൂന്നാംതരംഗം എത്രത്തോളം തീവ്രമായിരിക്കുമെന്ന് ഇപ്പോള് പറയാനാകില്ല. 71 ശതമാനം പേര്ക്ക് ഇതുവരെ ഒന്നാം ഡോസ് വാക്സിന് നല്കിയിട്ടുണ്ടെന്നും അദ്ദേഹം പറഞ്ഞു.
രാജ്യത്ത് 34 ജില്ലകളില് ടെസ്റ്റ് പോസിറ്റിവിറ്റി നിരക്ക് 34 ശതമാനത്തിനും മുകളിലാണ്. 28 ജില്ലകളില് അഞ്ചിനും പത്തിനും ഇടയിലാണ് പോസിറ്റിവിറ്റി നിരക്ക്. രാജ്യത്ത് ഉത്സവസീസണ് ആരംഭിക്കാനിരിക്കെ ജനങ്ങള് ജാഗ്രത പുലര്ത്തണമെന്ന് ആരോഗ്യമന്ത്രാലയം ജോയിന്റ് സെക്രട്ടറി ലവ് അഗര്വാള് ആവശ്യപ്പെട്ടു.
ആഘോഷങ്ങള് പരമാവധി വീട്ടിലാക്കണമെന്ന് കേന്ദ്രസര്ക്കാര് നിര്ദേശിച്ചു. വാക്സിനെടുക്കാനും എല്ലാവരും ശ്രദ്ധിക്കണമെന്നും അദ്ദേഹം നിര്ദേശിച്ചു. ലക്ഷദ്വീപ്, ഛണ്ഡിഗഢ്, ഗോവ, ഹിമാചല്പ്രദേശ്, ആന്ഡമാന്&നിക്കോബാര്, സിക്കിം തുടങ്ങിയ സംസ്ഥാനങ്ങളില് 100 ശതമാനം പേര്ക്കും വാക്സിന് നല്കിയെന്ന് കേന്ദ്രസര്ക്കാര് അറിയിച്ചു.