പരിയാരം: അബദ്ധത്തില് മരക്കഷണം വിഴുങ്ങിയതിനെത്തുടര്ന്ന് ശ്വാസതടസം നേരിട്ട് ഗുരുതരാവസ്ഥയിലായ എട്ടു മാസം മാത്രം പ്രായമുള്ള കുഞ്ഞിനെ കണ്ണൂര് ഗവ. മെഡിക്കല് കോളജ് ആശുപത്രിയില് സങ്കീര്ണ ശസ്ത്രക്രിയയിലൂടെ രക്ഷിക്കാനായി . കുഞ്ഞിന്റെ ശ്വാസകോശത്തില് കുടുങ്ങിക്കിടന്ന മരക്കഷണം പുറത്തെടുത്തത് അത്യാധുനിക കാമറ സഹിതമുള്ള നവീന റിജിഡ് ബ്രോങ്കോ സ്കോപ്പി ചികിത്സ നടത്തിയാണ് .
കുഞ്ഞ് അടുക്കളയില് കളിച്ചുകൊണ്ടിരിക്കെയാണ് കൈയില് കിട്ടിയ സാധനം വായിലേക്കിട്ടത്. തുടര്ന്ന് കുട്ടിയുടെ അമ്മ വായില് കൈയിട്ട് പുറത്തെടുക്കാന് ശ്രമിച്ചെങ്കിലും, അതിനു സാധിച്ചിരുന്നില്ല.
ഉടന്തന്നെ കുഞ്ഞിനെ അടുത്തുള്ള ആശുപത്രിലെത്തിച്ചു അടിയന്തര ചികിത്സ നല്കി. ശേഷം ഉടന് തന്നെ കുഞ്ഞിനെ കണ്ണൂര് ഗവ. മെഡിക്കല് കോളജ് ആശുപത്രിയിലേക്ക് മാറ്റി. അവിടെ നടത്തിയ പരിശോധനയില് വലത്തെ ശ്വാസകോശത്തില് എന്തോ കുടുങ്ങിക്കിടക്കുന്നതായി കണ്ടെത്തുകയായിരുന്നു.