റോം: ഓകസ്​ഫോഡിന്‍െറ ആസ്ട്രസെനക വാക്​സിന്‍ 60 വയസ്സിനു മുകളിലുള്ളവര്‍ക്ക് മാത്രമായി പരിമിതപ്പെടുത്തുമെന്ന് ഇറ്റാലിയന്‍ അധികൃതര്‍ അറിയിച്ചു. നിലവില്‍ ഒരു ഡോസ്​ ആസ്​ട്രസെനക എടുത്ത ചെറുപ്പക്കാരില്‍ രണ്ടാമത്തെ ഡോസ്​ എം.ആര്‍.എന്‍.എ അധിഷ്​ഠിത മറ്റു വാക്​സിനുകള്‍ നല്‍കും.

ഇറ്റലിയിലെ കൊറോണ വൈറസ് അണുബാധ നിരക്ക് കുറഞ്ഞതിനെ തുടര്‍ന്നാണ് ഈ മാറ്റം. കേസുകള്‍ കുറഞ്ഞതിനാല്‍ അടുത്തയാഴ്​ച മുതല്‍ രാജ്യത്തിന്‍െറ പല ഭാഗങ്ങളിലും നിയന്ത്രണങ്ങള്‍ നീക്കും.

ഏപ്രിലില്‍ യൂറോപ്യന്‍ യൂനിയന്‍െറ മെഡിസിന്‍ ഏജന്‍സി, ആസ്​ട്രസെനക ഉപയോഗിക്കുന്നവരില്‍ അത്യപൂര്‍വമായി രക്​തം കട്ടപിടിക്കുന്നത്​ റിപ്പോര്‍ട്ട്​ ചെയ്​തിരുന്നു.എന്നാല്‍, വാക്​സിന്‍െറ അപകട സാധ്യത​കളേക്കാള്‍ അവയുടെ പ്രയോജനങ്ങള്‍ കാരണം ഇവ ഉപയോഗിക്കാന്‍ നിര്‍ദേശിച്ചു.

ഇറ്റാലിയന്‍ സര്‍ക്കാറിന്‍െറ സാങ്കേതിക ശാസ്ത്ര സമിതിയുടെ (സി.ടി.എസ്) നിര്‍ദേശപ്രകാരമാണ്​ ആരോഗ്യ മന്ത്രാലയം ആസ്ട്രസെനക വാക്​സിന്‍ 60ന്​ മുകളില്‍ പ്രായമുള്ളവര്‍ക്ക് മാത്രം നല്‍കിയാല്‍ മതിയെന്ന്​ അറിയിച്ചത്​. പരമാവധി ജാഗ്രത പുലര്‍ത്തുക എന്ന തത്വത്തിന്‍െറ അടിസ്​ഥാനത്തിലാണിത്​.

ആസ്‌ട്രസെനകയുടെ ആദ്യ ഡോസ് ഇതിനകം ലഭിച്ച 60 വയസ്സിന് താഴെയുള്ളവര്‍ക്ക്, എട്ട് മുതല്‍ 12 ആഴ്ചകള്‍ക്കുശേഷം ഫൈസര്‍, മോഡേണ പോലുള്ള എം‌.ആര്‍.‌എന്‍.‌എ അധിഷ്​ഠിത വാക്​സിന്‍ എടുക്കാവുന്നതാണ്​.

ആരോഗ്യപരമായ ആശങ്കകളെത്തുടര്‍ന്ന് മാര്‍ച്ചില്‍ ഇറ്റലി ആസ്ട്രസെനക വാക്​സിന്‍ തടഞ്ഞിരുന്നു. എന്നാല്‍, യൂറോപ്യന്‍ യൂനിയന്‍െറ മെഡിസിന്‍സ്​ ഏജന്‍സി പച്ചക്കൊടി നല്‍കിയശേഷം 18 വയസ്സിനു മുകളിലുള്ള എല്ലാവര്‍ക്കും നല്‍കാന്‍ തുടങ്ങി.

60 വയസ്സിന്​ മുകളിലുള്ളവര്‍ക്ക് അസ്​ട്രസെനകയായിരുന്നു മുന്‍ഗണന നല്‍കിയിരുന്നത്​. എന്നാല്‍, നിരവധി ചെറുപ്പക്കാരും ഇത്​ ഉപയോഗിച്ചു.

ഇറ്റലി ഇതുവരെ 41 ദശലക്ഷം വാക്​സിനുകള്‍ നല്‍കിയിട്ടുണ്ട്. 60 ദശലക്ഷം ജനസംഖ്യയില്‍ 14 ദശലക്ഷം ആളുകള്‍ക്ക് പൂര്‍ണമായും പ്രതിരോധ കുത്തിവെപ്പ്​ ലഭിച്ചതായും അധികൃതര്‍ അറിയിച്ചു.

തിങ്കളാഴ്​ച മുതല്‍ മിലാനിലും റോമിലും സമീപ സ്​ഥലങ്ങളിലും ഉള്‍പ്പെടെ 40 ദശലക്ഷത്തിലധികം ആളുകള്‍ താമസിക്കുന്ന പ്രദേശങ്ങളിലെ നിയന്ത്രണങ്ങളെ ഏറ്റവും കുറഞ്ഞ അപകടസാധ്യതയുള്ള ‘വൈറ്റ്’ സോണിലേക്ക്​ മാറ്റും​. മാസ്​ക്​ ധരിക്കല്‍, സാമൂഹിക അകലം പാലിക്കല്‍ എന്നിവ ഒഴികെ മിക്ക കൊറോണ വൈറസ് നിയന്ത്രണങ്ങളും ലഘൂകരിക്കും.