ലണ്ടന്‍: ഇംഗ്ലീഷ് പ്രീമിയര്‍ ലീഗ് സീസണിലെ മികച്ച താരമായി മാഞ്ചസ്റ്റര്‍ സിറ്റിയുടെ പോര്‍ചുഗല്‍ ഡിഫന്‍ഡര്‍ റൂബന്‍ ഡയസ് തെരഞ്ഞെടുക്കപ്പെട്ടു. 20 ക്ലബുകളുടെയും ക്യാപ്റ്റന്മാരും ഫുട്ബാള്‍ വിദഗ്ധരുടെ പാനലും ചേര്‍ന്നാണ് ജേതാവിനെ കണ്ടെത്തിയത്. കെവിന്‍ ഡിബ്രൂയ്ന, ബ്രൂണോ ഫെര്‍ണാണ്ടസ്, ജാക്ക് ഗ്രീലിഷ്, ഹാരി കെയ്ന്‍, മാസണ്‍ മൗണ്ട്, മുഹമ്മദ് സലാഹ്, തോമസ് സൗസക് എന്നിവരെ മറികടന്നാണ് സീസണിന്‍റെ തുടക്കത്തില്‍ ബെന്‍ഫിക്കയില്‍നിന്ന് സിറ്റിയിലെത്തിയ 24കാരന്‍ മികച്ച താരമായത്.
നെമാന്‍യ വിദിച്, വിന്‍സെന്‍റ് കൊമ്ബനി, വിര്‍ജില്‍ വാന്‍ഡൈക് എന്നിവര്‍ക്കുശേഷം പുരസ്കാരം നേടുന്ന നാലാമത്തെ പ്രതിരോധക്കാരനാണ് ഡയസ്. നേരത്തേ ഫുട്ബാള്‍ റൈറ്റേഴ്സ് അസോസിയേഷന്‍റെ പുരസ്കാരവും ഡയസിനെ തേടിയെത്തിയിരുന്നു. ഫുട്ബാള്‍ പ്ലെയേഴ്സ് അസോസിയേഷന്‍റെ പുരസ്കാരപ്പട്ടികയിലും സാധ്യത കല്‍പിക്കപ്പെടുന്ന താരമാണ് ഡയസ്.
മാഞ്ചസ്റ്റര്‍ ആസ്ഥാനമായുള്ള പ്രൊഫഷനല്‍ ഫുട്ബാളേഴ്സ് അസോസിയേഷന്‍ പ്രീമിയര്‍ ലീഗ് ടീം ഓഫ് ദി ഇയര്‍
ഗോള്‍കീപ്പര്‍: എഡേഴ്സണ്‍ (മാഞ്ചസ്റ്റര്‍ സിറ്റി)
പ്രതിരോധം: കാന്‍സെലോ, സ്റ്റോണ്‍സ്, റൂബന്‍ ഡയസ് (മാഞ്ചസ്റ്റര്‍ സിറ്റി), ലൂക് ഷാ (മാഞ്ചസ്റ്റര്‍ യുനൈറ്റഡ്)
മധ്യനിര: ഇല്‍കായ് ഗുന്‍ഡോഗന്‍, കെവിന്‍ ഡീബ്രുയ്നെ (മാഞ്ചസ്റ്റര്‍ യുനൈറ്റഡ്), ബ്രൂണോ ഫെര്‍ണാണ്ടസ് ( മാഞ്ചസ്റ്റര്‍ യുനൈറ്റഡ്)
മുന്നേറ്റനിര: മുഹമ്മദ് സലാഹ് (ലിവര്‍പൂള്‍), ഹാരികെയ്ന്‍ (ടോട്ടന്‍ഹാം), സണ്‍ ഹ്യൂയാങ് മിന്‍(ടോട്ടന്‍ഹാം).
