ഡെറാഡൂണ്: കോവിഡ് കേസുകള് വര്ധിക്കുന്നതിനിടെ ഹരിദ്വാര് കുംഭമേളയില് നിന്ന് പിന്മാറി രണ്ട് സന്യാസി സമൂഹങ്ങള്. നിരഞ്ജിനി അഖാഡയും തപോ നിധി ശ്രീ ആനന്ദ് അഖാഡയുമാണ് കുംഭമേളയില് നിന്നുള്ള പിന്മാറ്റം പ്രഖ്യാപിച്ചത്. 13 സന്യാസി സമൂഹങ്ങളാണ് മേളയില് പങ്കെടുക്കുന്നത്. ഇരു സന്യാസി സമൂഹവും ഏപ്രില് 17ന് ശേഷം കുംഭമേളയില് പങ്കെടുക്കില്ലെന്ന് അറിയിച്ചിട്ടുണ്ട്.
കുംഭമേളയില് പങ്കെടുത്ത അഖില് ഭാരതീയ അഖാഡ പരിഷതിന്റെ പ്രസിഡന്റ് നരേന്ദ്ര ഗിരി കോവിഡ് ബാധിച്ച് ഋഷികേശ് എയിംസില് ചികിത്സയിലാണെന്നാണ് വിവരം. മധ്യപ്രദേശില് നിന്നുള്ള മഹാ നിര്വാനി അഖാഡയില് അംഗമായ സ്വാമി കപില് ദേവ് കഴിഞ്ഞ ദിവസം കോവിഡ് ബാധിച്ച് മരിക്കുകയും ചെയ്തിരുന്നു. ഇതിന് പിന്നാലെയാണ് സന്യാസ സമൂഹങ്ങളുടെ കുംഭമേളയില് നിന്നുള്ള പിന്മാറ്റം.
കുംഭമേളയില് പങ്കെടുത്ത രണ്ടായിരത്തോളും പേര്ക്ക് കോവിഡ് സ്ഥിരീകരിച്ചിരുന്നു. കഴിഞ്ഞ അഞ്ച് ദിവസത്തിനിടെയാണ് ഇത്രയും പേര്ക്ക് രോഗബാധ കണ്ടെത്തിയത്. കോവിഡിനിടെ കുംഭമേള നടത്തുന്നതിനെതിരെ രൂക്ഷമായ വിമര്ശനങ്ങള് ഉയരുകയും ചെയ്തിരുന്നു.