സംസ്ഥാനത്ത് കൊവിഡ് വ്യാപനം അതിരൂക്ഷമായി തുടരുന്ന സാഹചര്യത്തില് കൂട്ടപ്പരിശോധനയുമായി കേരളം. ഇന്നും നാളെയുമായി രണ്ടരലക്ഷം പേരെ പരിശോധിക്കാനാണ് ആരോഗ്യവകുപ്പിന്റെ ലക്ഷ്യം. ആര്ടിപിസിആര് , ആന്റിജന് പരിശോധനകളാണ് നടത്തുക. രോഗ വ്യാപന തീവ്രത കുറയ്ക്കാന് രോഗ ബാധിതരെ അടിയന്തരമായി കണ്ടെത്തി നിരീക്ഷണത്തിലേക്ക് മാറ്റണമെന്ന വിദഗ്ധ ഉപദേശം അനുസരിച്ചാണ് മാസ് പരിശോധന. കുറഞ്ഞ സമയത്തിനുള്ളില് പരമാവധി പേരെ പരിശോധിക്കുകയാണ് ലക്ഷ്യം.
പൊതുഗതാഗതം , വിനോദ സഞ്ചാരം , കടകള് , ഹോട്ടലുകള് , വിതരണ ശൃംഖലയിലെ തൊഴിലാളികള് , കൊവിഡ് വാക്സീന് ലഭിക്കാത്ത 45 വയസിന് താഴെയുള്ളവര് തുടങ്ങി പൊതുസമൂഹവുമായി അടുത്തിടപെഴകുന്ന മേഖലകളിലെ ഹൈ റിസ്ക് വിഭാഗങ്ങളെ കണ്ടെത്തിയാകും പരിശോധന. തെരഞ്ഞെടുപ്പുമായി ബന്ധപ്പെട്ട് പ്രവര്ത്തിച്ച പരമാവധിപേരെ പരിശോധനക്ക് വിധേയരാക്കും. രോഗ ലക്ഷണങ്ങളുള്ളവരേയും കണ്ടെത്തി പരിശോധിക്കും. ആശുപത്രികളില് ഓപികളിലെത്തുന്നവര് , കിടത്തി ചികില്സയിലുള്ളവര് ക്ലസ്റ്ററുകളിലും നിയന്ത്രിത മേഖലയിലും ഉള്ളവര് , സ്കൂള് , കോളജ് വിദ്യാര്ഥികള് എന്നിവരിലും പരിശോധന നടത്തും.
എന്നാല് ഏറ്റവും കൂടുതല് പരിശോധന നടത്താന് നിര്ദേശിച്ചിരിക്കുന്നത് എറണാകുളം, കോഴിക്കോട് ജില്ലകളിലാണ്. അതേസമയം മൂന്ന് മാസത്തിനുള്ളില് കൊവിഡ് വന്നുപോയവര് , രണ്ട് ഡോസ് കൊവിഡ് വാക്സീന് എടുത്തവര് എന്നിവര്ക്ക് ഈ ഘട്ടത്തില് പരിശോധന ഉണ്ടാകില്ല. സംസ്ഥാനത്തെ വാക്സീന് ക്ഷാമത്തിന് താല്കാലിക പരിഹാരമായി ഇന്ന് രണ്ട് ലക്ഷം ഡോസ് വാക്സീന് കേരളത്തിലെത്തും. കൊവിഷീല്ഡ് വാക്സിനാണ് എത്തിക്കുന്നത്. വൈകുന്നേരത്തോടെയാണ് വാക്സീനെത്തുക. ഇതോടെ നിര്ത്തിവച്ച പല ക്യാംപുകളും നാളെ മുതല് വീണ്ടും തുടങ്ങാനാകുമെന്നാണ് ആരോഗ്യവകുപ്പിന്റെ വിലയിരുത്തല്.