അബുദാബി∙ പ്രമേഹം പെട്ടന്നു സുഖപ്പെടുത്തുന്ന മരുന്ന് വികസിപ്പിച്ച് അബുദാബി ന്യൂയോർക്ക് യൂണിവേഴ്സിറ്റിയിലെ ഗവേഷകർ. ഉയർന്ന പ്രമേഹ രോഗമുള്ളവർ മരുന്ന് കഴിച്ചാൽ 2 മണിക്കൂറിനകം രക്തത്തിലെ പഞ്ചസാര ക്രമീകരിക്കുമെന്ന് ഗവേഷകർ പറയുന്നു.
പരീക്ഷണാടിസ്ഥാനത്തിൽ സജ്ജമാക്കിയ മരുന്ന് പരമ്പരാഗത ഇൻസുലിനു ബദലാകുമെന്ന് ഗവേഷകർ അവകാശപ്പെട്ടു. വിവിധ പാളികളുള്ള നാനോഷീറ്റുകൾക്കിടയിൽ ഇൻസുലിൻ ഘടകങ്ങൾ നിറച്ചു തയാറാക്കുന്ന മരുന്ന് വേഗം ശരീരത്തിലേക്കു വലിച്ചെടുക്കുന്നതിനാലാണ് പെട്ടന്നു ഫലം ലഭിക്കുന്നത്. ഇതുമൂലം ഇൻസുലിന്റെ ഓവർഡോസ് ഒഴിവാക്കാനാകും. യൂണിവേഴ്സിറ്റിയിലെ ട്രബോൽസി റിസർച്ച് ഗ്രൂപ്പിന്റെ പഠന റിപ്പോർട്ട് മെഡിക്കൽ ജേണൽ കെമിക്കൽ സയൻസിൽ പ്രസിദ്ധീകരിച്ചിട്ടുണ്ട്.
അൾജീരിയ, സ്പെയിൻ, സൗദി അറേബ്യ, യുകെ രാജ്യങ്ങളിൽനിന്നുള്ള ഗവേഷകരുടെ സഹകരണത്തോടെയായിരുന്നു പരീക്ഷണം. യുഎഇയിൽ ആറിൽ ഒരാൾ പ്രമേഹരോഗികളാണെന്നാണ് കണക്ക്. 60 വയസിൽ താഴെ മരിക്കുന്നവരിൽ മൂന്നിൽ രണ്ടുപേരും പ്രമേഹ രോഗികളും.
