തമിഴ് നടൻ വിജയ് സൈക്കിളിൽ വോട്ട് ചെയ്യാനെത്തിയത് പോളിംഗ് ബൂത്ത് വീടിനടുത്തായതിനാലെന്ന് നടൻ്റെ പിആർഓ റിയാസ് കെ അഹ്മദ്. ഇന്ധനവിലക്കെതിരെ പ്രതിഷേധിച്ചാണ് വിജയ് സൈക്കിളിൽ വോട്ട് ചെയ്യാനെത്തിയതെന്ന തരത്തിൽ സമൂഹമാധ്യമങ്ങളിൽ പ്രചാരണം നടന്നിരുന്നു. ഇതിനു പിന്നാലെയാണ് വിജയുടെ പിആർഓ ഇക്കാര്യത്തിൽ വിശദീകരണവുമായി രംഗത്തെത്തിയത്.
“കാർ ഉപയോഗിക്കാതെ വിജയ് സൈക്കിളിൽ വോട്ടു ചെയ്യാൻ പോയത് പോളിംഗ് ബൂത്ത് അദ്ദേഹത്തിൻ്റെ വീടിനടുത്ത് ആയതിനാലാണ്. കാറിൽ യാത്ര ചെയ്താൽ റോഡിൽ കൂടുതൽ തിരക്കുണ്ടാവാൻ ഇടയുണ്ട് എന്നതും ഒരു കാരണമായിരുന്നു. അതിനു പിന്നിൽ മറ്റൊരു ഉദ്ദേശ്യവും ഉണ്ടായിരുന്നില്ല.”- റിയാസ് ട്വീറ്റ് ചെയ്തു.