കൊല്ലം: പാര്‍ലമെന്‍ററി രാഷ്ട്രീയത്തിലുള്ളവര്‍ അധികാരം നിലനിര്‍ത്താന്‍ വ്യവസ്ഥിതിയോട് സമരസപ്പെട്ടാലും കേരള പുലയര്‍ മഹാസഭക്ക് സാമൂഹിക വിപ്ലവത്തിനെ കൈയൊഴിയാനാകില്ലെന്ന് സംസ്ഥാന ജനറല്‍ സെക്രട്ടറി പുന്നല ശ്രീകുമാര്‍. കെ.പി.എം.എസ് 49ാം സംസ്ഥാന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഇൗ തെരഞ്ഞെടുപ്പില്‍ ശബരിമല വിഷയം പ്രസക്തമല്ല. നവോത്ഥാന സമിതിയുടെ ഭാഗമായി തുടര്‍ന്ന് പ്രവര്‍ത്തിക്കാന്‍ കഴിയാതെ വന്നാലും പരിഷ്കരണ മുദ്രാവാക്യവുമായി കെ.പി.എം.എസ് മുന്നോട്ടുപോകും. മുന്നാക്ക സംവരണം നടപ്പാക്കുന്നതില്‍ വ്യഗ്രത കാണിച്ച സംസ്ഥാന സര്‍ക്കാര്‍ സ്വകാര്യ മേഖല സംവരണം നടപ്പാക്കണം. ഇതിനായി പ്രക്ഷോഭത്തിലേക്ക് നീങ്ങും. പട്ടിക വിഭാഗങ്ങളുടെ ഭൂ പ്രശ്നം അടക്കം സാമൂഹിക വിഷയങ്ങള്‍ നിലനില്‍ക്കുേമ്ബാഴാണ് ശബരിമല പോലെ കാലഹരണപ്പെട്ട വിഷയങ്ങള്‍ ചര്‍ച്ച ചെയ്ത് രാഷ്ട്രീയ പാര്‍ട്ടികള്‍ സമൂഹത്തെ തെറ്റിദ്ധരിപ്പിക്കുന്നതെന്നും പുന്നല പറഞ്ഞു.
വിവിധ ജില്ലകളില്‍നിന്ന് 418 പ്രതിനിധികളാണ് പെങ്കടുത്തത്. സംസ്ഥാന പ്രസിഡന്‍റ് വി. ശ്രീധരന്‍ അധ്യക്ഷത വഹിച്ചു. നേതാക്കളായ പി. ജനാര്‍ദനന്‍, പി.കെ. രാജന്‍, ബൈജു കലാശാല, പി.വി. ബാബു, സാബു കാരിശേരി, എന്‍. ബിജു, എ. സനീഷ് കുമാര്‍ എന്നിവര്‍ സംസാരിച്ചു.
