ന്യൂയോർക്ക്∙ ഫോമയുടെ യുവജന വിഭാഗത്തിന്റെ 2020-22 കാലത്തെ കമ്മിറ്റിയുടെ പ്രവർത്തനോദ്ഘാടനം ഫെബുവരി 27 ന് ഈസ്റ്റേൺ സ്റ്റാൻഡേർഡ് സമയം രാവിലെ 11 മണിക്ക് സൂം വെബിനാറിൽ പ്രശസ്ത ചലച്ചിത്ര താരം ദിവ്യ ഉണ്ണി നിർവഹിക്കും.
2020 -2022 വർഷക്കാലത്തെ കമ്മിറ്റിയുടെ പ്രവർത്തനങ്ങളുടെ നന്ദി കുറിക്കുന്ന ഉദ്ഘാടന ചടങ്ങിൽ, ന്യൂയോർക്ക് സ്റേറ് സെനറ്റർ കെവിൻ പീറ്റർ, ന്യൂയോർക്ക് സ്റേറ്റ് അസ്സംബ്ലി അംഗം ജെന്നിഫർ രാജ്‌കുമാർ, മിസ്സോറി സിറ്റി മേയർ റോബിൻ എലക്കാട്, പ്രശസ്ത റെയ്‌കി മാസ്റ്ററായ ഡോ.ബിന്ദു ബാബു, ഫോമാ പ്രസിഡന്റ് അനിയൻ ജോർജ്, ജനറല്‍ സെക്രട്ടറി ടി.ഉണ്ണികൃഷ്ണന്‍, ട്രഷറര്‍ തോമസ് ടി ഉമ്മന്‍, വൈസ് പ്രസിഡന്റ് പ്രദീപ് നായര്‍,ജോയിന്റ് സെക്രട്ടറി ജോസ് മണക്കാട്ട്, ജോയിന്റ് ട്രഷറര്‍ ബിജു തോണിക്കടവില്‍ എന്നിവർ ആശംസകൾ നേരും.
അമേരിക്കൻ ഐക്യനാടുകളിലെ അസോസിയേഷനുകളുടെ കേന്ദ്ര സംഘടനയായ ഫോമയുടെ യുവജന വിഭാഗമെന്ന നിലയിൽ വളരെയേറെ ഉത്തരവാദിത്തമുള്ള യൂത്ത് ഫോറം, വ്യത്യസ്തമായ പരിപാടികൾ കൊണ്ട് യുവജനങ്ങളെ ഏകോപിപ്പിച്ചു ഫോമയ്ക്ക് കരുത്ത് പകരുന്നതോടൊപ്പം, യുവജനങ്ങളിലെ കഴിവുകളെ തൊട്ടറിയുന്നതിനും പുനരുജ്ജീവിപ്പിക്കുന്നതിനും ലക്ഷ്യമിടുന്നു.
രാഷ്ട്രത്തിന്റെ നെടുംതൂണുകളായ യുവജനങ്ങളെ , രാഷ്ട്രീയ-സാംസ്കാരിക-വിദ്യാഭ്യാസ മേഖലകളിൽ കൈപിടിച്ചുയർത്തുന്നതിനും, അവരിലെ മാനുഷിക മൂല്യങ്ങളെ രാഷ്ട്ര പുനർ നിർമ്മാണ പ്രകിയയിൽ സജീവമായി ഉപയോഗിക്കപ്പെടുന്നതിന് ഉതകും വിധം യുവജനങ്ങളെ ശക്തിപ്പെടുത്തുകയും, ചെയ്യുന്ന വിവിധ കർമ്മ പരിപാടികൾക്കാണ് ഫോമാ യുവജന ഫോറം 2020-2022 വർഷത്തെ കമ്മിറ്റി രൂപം നൽകുന്നത്. യുവജനങ്ങളിലെ നേതൃത്വ ഗുണങ്ങളെ പരിപോഷിപ്പിക്കുന്നതിനു ലീഡർഷിപ്പ് ട്രെയിനിങ് ക്ളാസുകൾ, വിദ്യാഭാസ്യ രംഗത്തെ പുതിയ അറിവുകളും, തൊഴിൽ സാധ്യതകളും സംബന്ധിച്ചു അവബോധം ഉണ്ടാക്കുന്നതിനു വിദ്യഭ്യാസ സെമിനാറുകൾ, വിവിധ വിഷയങ്ങളെ സംബന്ധിച്ചു യുവജനങ്ങളെ പ്രബുദ്ധരാക്കുന്നതിനുള്ള സിമ്പോസിയങ്ങൾ, കലാ-സാംസ്കാരിക രംഗത്തോടെ കഴിവുകൾ മാറ്റുരക്കുന്നതിനുള്ള സാംസ്കാരികോത്സവങ്ങൾ, കലാമത്സരങ്ങൾ , എന്നിങ്ങനെ യുവജനങ്ങളുടെ സാമൂഹ്യ പ്രതിബദ്ധതയുടെ മാറ്റുരക്കുന്ന നിരവധി പരിപാടികൾ ഈ കമ്മറ്റി വിഭാവനം ചെയ്യുന്നു.
