കുവൈത്ത് സിറ്റി: 2020ല് രാജ്യത്ത് വിദേശികളുടെ എണ്ണത്തില് 1,34,000 കുറവ് രേഖപ്പെടുത്തി .മൊത്തം കുവൈത്ത് ജനസംഖ്യയില് 2.2 ശതമാനത്തിന്റെ കുറവാണുണ്ടായത്. സിവില് ഇന്ഫര്മേഷന് അതോറിറ്റിയുടെ റിപ്പോര്ട്ട് അനുസരിച്ച് വിദേശികളുടെ എണ്ണത്തില് നാല് ശതമാനത്തിന്റെ കുറവാണുണ്ടായത്. 2020 ഡിസംബര് അവസാനത്തെ കണക്ക് അനുസരിച്ച് കുവൈത്ത് ജനസംഖ്യ 46,70,000 ആണ്. 2019 അവസാനത്തില് ഇത് 47,76,000 ആയിരുന്നു.
വിദേശികളുടെ കൊഴിഞ്ഞുപോക്കാണ് രാജ്യനിവാസികളുടെ എണ്ണത്തില് കുറവിന് വഴിവെച്ചത്. വിദേശി ജനസംഖ്യ കഴിഞ്ഞ വര്ഷം അവസാനത്തെ കണക്കനുസരിച്ച് 32,10,000 ആണ്. 2019 അവസാനത്തില് ഇത് 33,44,000 ആയിരുന്നു. ആകെ കുവൈത്ത് വിട്ട പ്രവാസികളില് 52 ശതമാനവും ഇന്ത്യക്കാരാണ്.
അതെ സമയം 22.5 ശതമാനം ഈജിപ്തുകാരും പത്ത് ശതമാനം ബംഗ്ലാദേശികളും 4.5 ശതമാനം ഫിലിപ്പീനികളുമാണ്. കോവിഡ് പ്രതിസന്ധിയും സ്വദേശിവത്കരണ നടപടികളും വിസ പുതുക്കുന്നതിന് പ്രായപരിധി ഉള്പ്പെടെ നിബന്ധനകള് കൊണ്ടുവന്നതും വിദേശികളുടെ മടക്കത്തിന് കാരണമായി . അവധിക്ക് പോയ നിരവധി പേര് വിമാനമില്ലാത്തതിനാല് തിരിച്ചുവരാന് കഴിയാതെ കുടുങ്ങി. വിദേശികളുടെ എണ്ണം കുറച്ച് ജനസംഖ്യ സന്തുലനം സാധ്യമാക്കാനുള്ള ശ്രമത്തിലാണ് സര്ക്കാര്. ഈ നീക്കം വിജയം കാണുന്നതാണ് സമീപകാല കണക്കുകള് വിളിച്ചോതുന്നത്