ഡോ. ജോര്‍ജ് എം. കാക്കനാട്
ഹ്യൂസ്റ്റണ്‍: ഒരു തലമുറ ഇതുവരെ അനുഭവിച്ചിട്ടില്ലാത്ത ഏറ്റവും വലിയ ശീതകൊടുങ്കാറ്റില്‍ ടെക്‌സസിലെ ജനങ്ങള്‍ വലഞ്ഞു. മിക്കയിടത്തും വൈദ്യുതി തടസപ്പെട്ടതാണ് പ്രതിസന്ധി രൂക്ഷമാക്കിയത്. പലരും തണുപ്പിന്റെ കാഠിന്യത്തെ അതിജീവിക്കാന്‍ ഏറെ പണിപ്പെട്ടു. ബുധനാഴ്ചയും ടെക്‌സസിലെ മൂന്ന് ദശലക്ഷം ഉപഭോക്താക്കള്‍ക്ക് വൈദ്യുതിയില്ലായിരുന്നു. ഫോര്‍ട്ട് വര്‍ത്ത്, ഡാളസ് പ്രദേശങ്ങള്‍ ഉള്‍പ്പെടെ ഏകദേശം ഒരു ഡസനിലധികം കൗണ്ടികള്‍ക്ക് വ്യാഴാഴ്ച രാവിലെ വരെ ശീതകാല കൊടുങ്കാറ്റിന്റെ ജാഗ്രത മുന്നറിയിപ്പ് നല്‍കി. മെട്രോ മേഖലയുടെ വടക്കുകിഴക്ക് ആറ് ഇഞ്ച് വരെ മഞ്ഞുവീഴ്ചയും ഒന്ന് മുതല്‍ മൂന്ന് ഇഞ്ച് വരെ ഐസും പ്രതീക്ഷിക്കുന്നു.
കൊടും തണുപ്പിനെത്തുടര്‍ന്ന് കഴിഞ്ഞ ആഴ്ച മുതല്‍ രാജ്യത്തൊട്ടാകെ 30 പേരെങ്കിലും മരിച്ചു. ചൊവ്വാഴ്ച ബഫല്ലോയ്ക്ക് സമീപമുള്ള പ്രദേശങ്ങളില്‍ മണിക്കൂറില്‍ ഒന്ന് മുതല്‍ രണ്ട് ഇഞ്ച് വരെ മഞ്ഞുവീഴ്ചയുണ്ടായി. ഞായറാഴ്ച വൈകുന്നേരം മുതല്‍ ചിക്കാഗോയില്‍ കനത്ത മഞ്ഞുവീഴ്ച തുടരുകയാണ്. പ്രദേശവാസികള്‍ കടുത്ത ജാഗ്രത പാലിക്കണമെന്ന് ദേശീയ കാലാവസ്ഥാ സേവന കേന്ദ്രം മുന്നറിയിപ്പ് നല്‍കി. ഒറിഗോണിലെ 160,000ത്തിലധികം ആളുകള്‍ ബുധനാഴ്ച രാവിലെ വൈദ്യുതിയില്ലാതെ തുടര്‍ന്നു, കെന്റക്കി, വെസ്റ്റ് വെര്‍ജീനിയ, ലൂസിയാന എന്നിവിടങ്ങളില്‍ പതിനായിരക്കണക്കിന് ആളുകള്‍ക്ക് വൈദ്യുതിയില്ലാതെയായിരുന്നു.
വ്യാപകമായ ദുരിതത്തിന്റെ മൂന്നാം ദിവസത്തിലേക്ക് കടന്ന ടെക്‌സാസിലാണ് ഏറ്റവും വലിയ തകരാറുകള്‍ സംഭവിച്ചത്. 600,000 വീടുകളില്‍ ഒറ്റരാത്രികൊണ്ട് വൈദ്യുതി പുനഃസ്ഥാപിച്ചെങ്കിലും 2.7 ദശലക്ഷം ഉപഭോക്താക്കള്‍ക്ക് വൈദ്യുതിയില്ലാതെ തുടരുന്നതായി സംസ്ഥാനത്തെ പവര്‍ ഗ്രിഡ് കൈകാര്യം ചെയ്യുന്ന ഇലക്ട്രിക് റിലയബിലിറ്റി കൗണ്‍സില്‍ ഓഫ് ടെക്‌സസ് ബുധനാഴ്ച പറഞ്ഞു. സംസ്ഥാനത്തിന്റെ തലസ്ഥാനത്തെ സേവിക്കുന്ന ഓസ്റ്റിന്‍ എനര്‍ജി, ബുധനാഴ്ചയോടെ വൈദ്യുതി ലഭിച്ചേക്കുമെന്ന് അറിയിച്ചു. എന്നാല്‍, ഉപഭോക്താക്കള്‍ ക്ഷമയോടെ കാത്തിരിക്കാന്‍ തയ്യാറാകണമെന്ന് ഓസ്റ്റിന്റെ മേയര്‍ സ്റ്റീവ് അഡ്‌ലര്‍ പറഞഅഞു. ഫ്‌ലാഷ്‌ലൈറ്റുകളും മെഴുകുതിരികളും ഉപയോഗിച്ചും വൈദ്യുതി പരമാവധി കുറച്ച് ഉപയോഗിക്കണമെന്ന് ജനങ്ങളോട് ആവശ്യപ്പെട്ടിരുന്നു.
അതിനിടെ, ഗ്രേറ്റ് പ്ലെയിന്‍സിലും മിസിസിപ്പി താഴ്‌വരയിലും അടുത്ത രണ്ട് ദിവസത്തിനുള്ളില്‍ ഒരു പുതിയ ശൈത്യകാല കൊടുങ്കാറ്റ് വീശുമെന്ന് കാലാവസ്ഥ നിരീക്ഷണകേന്ദ്രം പ്രവചിക്കുന്നു. 100 ദശലക്ഷത്തിലധികം അമേരിക്കക്കാര്‍ ശൈത്യകാല കാലാവസ്ഥയുമായി ബന്ധപ്പെട്ട മുന്നറിയിപ്പിന് വിധേയമാണെന്ന് ദേശീയ കാലാവസ്ഥാ സേവനം അറിയിച്ചു. വിര്‍ജീനിയയെയും കാര്യമായി ബാധിക്കുന്ന കൊടുങ്കാറ്റ് വലിയരീതിയില്‍ നാശനഷ്ടങ്ങള്‍ ഉണ്ടാക്കുമെന്നും അതു കൊണ്ട് തന്നെ ജാഗ്രത പാലിക്കണമെന്നും റിച്ച്മണ്ടിലെ എന്‍ബിസി അഫിലിയേറ്റിലെ കാലാവസ്ഥാ നിരീക്ഷകന്‍ ജിം ഡങ്കന്‍ ചൊവ്വാഴ്ച രാത്രി ട്വിറ്ററില്‍ പറഞ്ഞു.
തിങ്കളാഴ്ച രാത്രി ഹ്യൂസ്റ്റണിലെ താപനില മൈനസ് 13 ഡിഗ്രിയായിരുന്നു. ഹ്യൂസ്റ്റണിനേക്കാള്‍ കുറഞ്ഞ തണുപ്പായിരുന്നു അലാസ്‌ക്കയിലേത്. ഒക്ലഹോമയുടെ തലസ്ഥാനം ചൊവ്വാഴ്ച 1899 ന് ശേഷമുള്ള ഏറ്റവും തണുപ്പുള്ള പ്രഭാതത്തെയാണ് അതിജീവിച്ചത്. ഇതു കുറഞ്ഞത് ഏതാനും ദിവസമെങ്കിലും തുടരും. മധ്യ, തെക്കന്‍ അമേരിക്കന്‍ ഐക്യനാടുകളില്‍ ഈ ആഴ്ചയിലെ ഉയര്‍ന്ന താപനില ശരാശരിയേക്കാള്‍ 25 മുതല്‍ 40 ഡിഗ്രി വരെ കുറവായിരിക്കുമെന്ന് കാലാവസ്ഥാ സേവനം അറിയിച്ചു. മഞ്ഞു വീഴ്ചയോടെപ്പം കൂടുതല്‍ മഴയും ഉണ്ടാകും. ചൊവ്വാഴ്ച രാവിലെ വരെ, അമേരിക്കന്‍ ഐക്യനാടുകളുടെ മുക്കാല്‍ ഭാഗവും മഞ്ഞുവീഴ്ചയില്‍ പുതഞ്ഞിരുന്നു, 2003 ല്‍ നാഷണല്‍ വാട്ടര്‍ സെന്റര്‍ അതിനായി ഒരു ഡാറ്റാബേസ് സൃഷ്ടിച്ചതിനുശേഷമുള്ള ഏറ്റവും വലിയ തണുപ്പാണ് രേഖപ്പെടുത്തിയത്.
പുതിയ കൊടുങ്കാറ്റ് ഒഹായോ വാലി, മിഡ്അറ്റ്‌ലാന്റിക് മേഖല, വടക്കുകിഴക്കന്‍ ഭാഗങ്ങള്‍ വഴി ബുധനാഴ്ചയോ വ്യാഴാഴ്ചയോ വരെ നീങ്ങുമെന്ന് ദേശീയ കാലാവസ്ഥാ സര്‍വീസ് അറിയിച്ചു. അപ്പലാചിയയുടെ ചില ഭാഗങ്ങളില്‍ ആറ് ഇഞ്ച് വരെ മഞ്ഞ് ലഭിക്കും. വിര്‍ജീനിയയ്ക്കും നോര്‍ത്ത് കരോലിനയ്ക്കും ഐസ്, തണുത്തുറഞ്ഞ മഴ എന്നിവ നേരിടേണ്ടിവരും. എല്ലായിടത്തും ഇത് കടുത്ത തണുപ്പായിരിക്കില്ല, പക്ഷേ മഞ്ഞ് വീഴുന്ന സ്ഥലങ്ങളില്‍ മഴയും ഇടിമിന്നലും നേരിടാം.
ആര്‍ട്ടിക് കാലാവസ്ഥയുടെ ശക്തമായ വീഴ്ചയില്‍ ഇലക്ട്രിക് ഗ്രിഡുകള്‍ തകരാറിലായതിനാല്‍ ടെക്‌സാസില്‍ വൈദ്യുതി തകരാര്‍ അതിരൂക്ഷമായിരുന്നു. ചൊവ്വാഴ്ച, ടെക്‌സസിലെ ഇലക്ട്രിക് റിലയബിലിറ്റി കൗണ്‍സിലിന്റെ അടിയന്തര പരിഷ്‌കരണത്തിന് ഗവര്‍ണര്‍ ഗ്രെഗ് അബോട്ട് ആവശ്യപ്പെട്ടു. സംസ്ഥാനത്തിന്റെ പവര്‍ ഗ്രിഡിന്റെ ഓപ്പറേറ്റര്‍ കഴിഞ്ഞ 48 മണിക്കൂറിനുള്ളില്‍ കിണഞ്ഞു ശ്രമിച്ചിട്ടും വൈദ്യുതി വിതരണം പുനഃസ്ഥാപിക്കാനായില്ല. ടെക്‌സസിലെ ഗ്രിഡ് പരാജയങ്ങള്‍ക്ക് പിന്നിലെ ചില പ്രധാന ഘടകങ്ങള്‍ അനലിസ്റ്റുകള്‍ തിരിച്ചറിയാന്‍ തുടങ്ങി. റെക്കോര്‍ഡ് തകര്‍ത്ത തണുത്ത കാലാവസ്ഥയായിരുന്നു പ്രധാന വില്ലന്‍. ഇതിനെത്തുടര്‍ന്ന് താമസക്കാരെ അവരുടെ ഇലക്ട്രിക് ഹീറ്ററുകള്‍ ഉപയോഗിക്കാന്‍ കാര്യമായി പ്രേരിപ്പിക്കുകയും ഗ്രിഡ് ഓപ്പറേറ്റര്‍മാര്‍ ആസൂത്രണം ചെയ്തിരുന്ന ഏറ്റവും മോശം സാഹചര്യങ്ങള്‍ക്കപ്പുറത്ത് വൈദ്യുതിയുടെ ആവശ്യകത വര്‍ധിക്കുകയും ചെയ്തു. അതേസമയം, സംസ്ഥാനത്തെ പല ഗ്യാസ് ഉപയോഗിച്ചുള്ള ഊര്‍ജ്ജ നിലയങ്ങളും മഞ്ഞുമൂടിയ നിലയിലായി. പ്രകൃതിവാതക ആവശ്യം രാജ്യവ്യാപകമായി വര്‍ദ്ധിച്ചതിനാല്‍ രൂക്ഷമായ ഇന്ധനക്ഷാമം നേരിടുന്നു. ടെക്‌സസിലെ പല കാറ്റാടി ടര്‍ബൈനുകളും പ്രവര്‍ത്തിക്കുന്നത് നിര്‍ത്തി. തത്ഫലമായുണ്ടായ വൈദ്യുതി ക്ഷാമം, ടെക്‌സസിലെ ഗ്രിഡ് ഓപ്പറേറ്റര്‍മാരെ തിങ്കളാഴ്ച മുതല്‍ വീടുകളിലും ബിസിനസുകളിലും പവര്‍ കട്ടുകള്‍ ഏര്‍പ്പെടുത്താന്‍ നിര്‍ബന്ധിതരായി. തെക്കുപടിഞ്ഞാറന്‍, മിഡ്‌വെസ്റ്റ് എന്നിവിടങ്ങളിലെ പ്രത്യേക പ്രാദേശിക ഗ്രിഡുകളും ഈ ആഴ്ച ഗുരുതരമായ സമ്മര്‍ദ്ദത്തിലാണ്.
