തിരുവനന്തപുരം: ഹയര്‍ സെക്കന്‍ഡറി പുനര്‍മൂല്യനിര്‍ണയത്തില്‍ മാര്‍ക്ക് ചേര്‍ത്തു കിട്ടുന്നതിനുള്ള കാലതാമസം കാരണം പല കുട്ടികള്‍ക്കും ഉപരിപഠനത്തിനു പ്രവേശനം കിട്ടാതെ പോകുന്ന സാഹചര്യം കണക്കിലെടുത്ത് പുതിയ ഉത്തരവ് പുറത്തിറക്കി സംസ്ഥാന ബാലാവകാശ സംരക്ഷണ കമ്മീഷന്‍.
പുനര്‍മൂല്യനിര്‍ണയത്തില്‍ മാര്‍ക്ക് വ്യത്യാസമുള്ള വിദ്യാര്‍ഥികള്‍ക്ക് പഴയ മാര്‍ക്ക് ലിസ്റ്റ് സമര്‍പ്പിച്ച്‌ പത്ത് ദിവസത്തിനകം പുതിയതു നല്‍കണമെന്നാണ് പുതിയ ഉത്തരവ്. പൊതു വിദ്യാഭ്യാസ സെക്രട്ടറിയും ഡയറക്ടറും ഇതനുസരിച്ച്‌ പരീക്ഷ വിജ്ഞാപനം പരിഷ്കരിക്കുന്നതിന് നടപടി സ്വീകരിക്കണമെന്ന് ഉത്തരവില്‍ പറയുന്നു. കമ്മീഷന്‍ അംഗം കെ. നസീര്‍ ആണ് പുതിയ ഉത്തരവ് പുറപ്പെടുവിച്ചത്.
