മുംബൈ: ബോളിവുഡിലെ ഹിറ്റ് സിനിമകളിലൊന്നായ ‘കുച്ച്‌കുച്ച്‌ ഹോതാ ഹെ..’ കണ്ടവരൊന്നും ആ കുസൃതിക്കുടുക്കയെ മറന്നിട്ടുണ്ടാവില്ല. ഷാറൂഖ് ഖാനും കാജലും റാണി മുഖര്‍ജിയും തകര്‍ത്തഭിനയിച്ച സിനിമയിലെ ആറു വയസ്സു മാത്രമുള്ള പഞ്ചാബി ബാലനെ ഇഷ്ടപ്പെടാത്തവര്‍ ചുരുക്കം. സിനിമയിലെ പ്രധാന കഥാപാത്രങ്ങളിലൊന്നായ ആ ബാലനെ കുരുന്നുപ്രായത്തില്‍ വെള്ളിത്തിരയില്‍ അഭിനയിച്ചു ഫലിപ്പിച്ചത് പര്‍സാന്‍ ദസ്തൂര്‍ ആയിരുന്നു.
1998 ഒക്ടോബര്‍ 16ന് റിലീസായ സിനിമയിലെ ഈ ബാലതാരം ഇപ്പോള്‍ വാര്‍ത്തകളില്‍ ഇടംപിടിക്കുന്നത് കല്യാണവിശേഷങ്ങളുമായാണ്. ഇന്‍സ്റ്റഗ്രാമിലൂടെയാണ് പര്‍സാന്‍ തെന്‍റ വിവാഹത്തെക്കുറിച്ച്‌ അറിയിച്ചത്. കാമുകി ഡെല്‍ന ഷ്റോഫുമായി അടുത്ത വര്‍ഷം ഫെബ്രുവരിയില്‍ വിവാഹം നടക്കുന്ന വിവരമാണ് 28കാരനായ പര്‍സാന്‍ ഇന്‍സ്റ്റഗ്രാമില്‍ പങ്കുവെച്ചത്. ഡെല്‍നയുമൊത്ത് ബീച്ചില്‍ നില്‍ക്കുന്ന ചിത്രം പങ്കുവെച്ചായിരുന്നു പോസ്റ്റ്. മുംബൈയിലെ പാര്‍സി കുടുംബാംഗമാണ് പര്‍സാന്‍.
കുച്ച്‌ കുച്ച്‌ ഹോതാ ഹെയിലെ ഒന്നും മിണ്ടാത്ത പഞ്ചാബി ബാലനായുള്ള പര്‍സാെന്‍റ വേഷം രാജ്യവ്യാപകമായി ഏറെ ആരാധകരെ നേടിക്കൊടുത്തിരുന്നു. ഒടുവില്‍ കണ്ണീരോടെ ‘തുസീ ജാ രഹേ ഹോ? തുസീ നാ ജാവോ..’ (നിങ്ങള്‍ പോകുകയാണോ? നിങ്ങള്‍ പോകരുത്) എന്ന് പറയുന്ന ഡയലോഗും സിനിമയിലെ എക്കാലവും ഓര്‍മിക്കുന്ന ഒന്നായി മാറി. സല്‍മാന്‍ ഖാന്‍, അനുപം ഖേര്‍, ഫരീദ ജലാല്‍, റീമ ലാഗൂ, അര്‍ച്ചന പൂരണ്‍ സിങ് എന്നിവരും കുച്ച്‌ കുച്ച്‌ ഹോതാഹെയില്‍ അഭിനയിച്ചിട്ടുണ്ട്.
ഒരുപാട് പരസ്യചിത്രങ്ങളിലും അക്കാലത്ത് പര്‍സാന്‍ മുഖംകാണിച്ചു. കഹോനാ പ്യാര്‍ഹെ, മൊഹബ്ബത്തേന്‍, സുബൈദാ, കഭീ ഖുഷീ കഭീ ഗം, ഹാഥീ കാ അണ്ഡാ, ഹം തും, പര്‍സാനിയ, എന്നീ ചിത്രങ്ങളിലും ബാലതാരമായി അഭിനയിച്ചിട്ടുണ്ട്.
