ലോകത്ത് കോവിഡ് ബാധിതരുടെ എണ്ണം ഒന്നരക്കോടി കവിഞ്ഞു. ഇതുവരെ 15,641,091 പേര്‍ക്കാണ് കോവിഡ് ബാധിച്ചത്.ആറര ലക്ഷത്തോളം പേര്‍ക്ക് ജീവന്‍ നഷ്ടമാകുകയും ചെയ്തു. ഇന്നുവരെ 635,633 പേരാണ് കോവിഡ് ബാധിച്ച്‌ മരിച്ചത്. 9,530,008 പേര്‍ ഇതിനകം രോഗ മുക്തരായെന്നത് ആശ്വാസകരമാണ്. ലോകത്ത് ആകെ 5,475,450 കോവിഡ് രോഗികളാണുള്ളത്. കോവിഡ് ബാധിച്ച 213 രാജ്യങ്ങളിലായി 5,475,450 പേര്‍ ഗുരുതരാവസ്ഥയിലാണ്.
ലോകത്ത് കൊവിഡ് വ്യാപനം ഏറ്റവും തീവ്രമായ രാജ്യമാണ് അമേരിക്ക. ഇതിനകം റിപ്പോര്‍ട്ട് ചെയ്യപ്പെട്ടത് 4,126,112 പോസിറ്റീവ് കേസുകളാണ് എന്ന് വേള്‍ഡോ മീറ്റര്‍ വ്യക്തമാക്കുന്നു. അമേരിക്കയില്‍ 10,000 പേരെ എടുത്താല്‍ 120 ആളുകളും കൊവിഡ് രോഗികളാണ്. ഇതുവരെ 146,000ലേറെ പേര്‍ മരണപ്പെട്ട യുഎസ് ആളോഹരി മരണനിരക്കില്‍ ആറാം സ്ഥാനത്താണ്. യുകെ, സ്‌പെയിന്‍, ഇറ്റലി, ചിലി, ഫ്രാന്‍സ് എന്നീ രാജ്യങ്ങളാണ് അമേരിക്കയ്‌ക്ക് മുന്നില്‍. ഇന്ന് ഇതുവരെ 25,000ത്തിലേറെ പുതിയ രോഗികള്‍ അമേരിക്കയിലുണ്ടായി. പുതുതായി 400 മരണങ്ങളും റിപ്പോര്‍ട്ട് ചെയ്തു.
ലാറ്റിനമേരിക്കയിലെ കൊവിഡ് രോഗികള്‍ 40 ലക്ഷം പിന്നിട്ടു. അമേരിക്ക കഴിഞ്ഞാല്‍ ലാറ്റിനമേരിക്കന്‍ രാജ്യമായ ബ്രസീലിലാണ് കൊവിഡ് ഏറ്റവും കൂടുതല്‍ നാശം വിതച്ചത്. 22 ലക്ഷത്തിലേറെ പോസിറ്റീവ് കേസുകളും 83,000ത്തോളം മരണവുമാണ് ബ്രസീലിനെ പിടിച്ചുലച്ചത്. 10 ലക്ഷത്തിലേറെ രോഗികളുള്ള ഇന്ത്യയാണ് കൊവിഡ് വ്യാപനത്തില്‍ ലോകത്ത് മൂന്നാമത്.
