ന്യൂഡല്‍ഹി: ഗുണ്ടാനേതാവ് വികാസ് ദുബെ ഏറ്റുമുട്ടലില്‍ കൊല്ലപ്പെട്ടത് അന്വേഷിക്കുന്ന സമിതി പുനഃസംഘടിപ്പിക്കാന്‍ സുപ്രീം കോടതി ചീഫ് ജസ്റ്റീസ് എസ്.എ. ബോബ്ഡെ നിര്‍ദേശം നല്‍കി. റിട്ടയേര്‍ഡ് അലഹബാദ് ഹൈക്കോടതി ജഡ്ജി കേസ് അന്വേഷിക്കുമെന്നാണ് യുപി സര്‍ക്കാര്‍ അറിയിച്ചത്. എന്നാല്‍ വിരമിച്ച സുപ്രീം കോടതി ജഡ്‌ജിയെയും വിരമിച്ച ഉന്നത പൊലീസ് ഉദ്യോഗസ്ഥനെയും ഉള്‍പ്പെടുത്തി സമിതി പുനസംഘടിപ്പിക്കാന്‍ സുപ്രീം കോടതി നിര്‍ദ്ദേശം നല്‍കി.
അന്വേഷണ സമിതി പുനഃസംഘടിപ്പിക്കാനുള്ള സുപ്രീംകോടതി നിര്‍ദേശം അംഗീകരിക്കുമെന്ന് യുപി സര്‍ക്കാര്‍ അറിയിച്ചു. കേസില്‍ ഉത്തര്‍പ്രദേശ് സര്‍ക്കാരിനെതിരെ സുപ്രീംകോടതി രൂക്ഷ വിമര്‍ശനം ഉന്നയിച്ചു. നിയമവ്യവസ്ഥ പാലിക്കേണ്ട ഉത്തരവാദിത്തം എല്ലാവര്‍ക്കും ഉണ്ടെന്ന് ചീഫ് ജസ്റ്റിസ് സംസ്ഥാന സര്‍ക്കാരിനെ ഓര്‍മിപ്പിച്ചു. 65 കേസില്‍ പ്രതിയായ കൊടുംകുറ്റവാളിക്ക് എങ്ങനെയാണ് ഈ കേസുകളിലെല്ലാം ജാമ്യം കിട്ടിയത്. ദുബെയ്ക്ക് ജാമ്യം ലഭിച്ചത് ഭരണകൂടത്തിന്‍റെ വീഴ്ചയാണെന്നും കോടതി ചൂണ്ടിക്കാട്ടി.
ദുബെ കൊല്ലപ്പെട്ട സംഭവം കേന്ദ്ര ഏജന്‍സികള്‍ അന്വേഷിക്കണം എന്ന ഹര്‍ജിയില്‍ വാദം കേള്‍ക്കുന്നതിനിടെയാണ് ചീഫ് ജസ്റ്റീസിന്‍റെ പരാമര്‍ശം. കേസുമായി ബന്ധപ്പെട്ട എല്ലാ ഉത്തരവുകളും കോടതിയില്‍ ഹാജരാക്കാനും ചീഫ് ജസ്റ്റിസ് നിര്‍ദ്ദേശം നല്‍കി. ബുധനാഴ്ച ഹാജരാക്കാമെന്ന് ഉത്തര്‍പ്രദേശ് സര്‍ക്കാര്‍ കോടതിയെ അറിയിച്ചു.
