ന്യൂഡല്ഹി: ഫെയ്സ്ബുക്ക് ഉപയോഗം നിരോധിക്കാന് എല്ലാ സൈനിക വിഭാഗങ്ങള്ക്കും കേന്ദ്ര ആഭ്യന്തരമന്ത്രാലയം നിര്ദേശം നല്കി. സിആര്പിഎഫ്, ബിഎസ്എഫ്, ഐടിബിപി, എസ്എസ്ബി, സിഐഎസ്എഫ്, എന്എസ്ജി തുടങ്ങിയ സേനകളിലും ഈ വിഭാഗങ്ങളില് നിന്നു വിരമിച്ചവര്ക്കുമാണ് നിരോധനം ഏര്പ്പെടുത്തിയത്. സുരക്ഷ മുന്നിര്ത്തിയാണ് ഫെയ്സ്ബുക്കിന് നിരോധനമേര്പ്പെടുത്തിയത്.
നിലവില് സേവനത്തിലുള്ള സൈനികരുമായി നിരന്തരം ബന്ധപ്പെടുന്നതിനാലാണ് സര്വീസില് നിന്നു വിരമിച്ചവര്ക്കും നിരോധനം ബാധകമാക്കിയിരിക്കുന്നത്. രഹസ്യ വിവരങ്ങള് ആപ്പുകളിലൂടെ ചോരുന്നെന്നു കണ്ടെത്തി ഇന്സ്റ്റഗ്രാം, പബ്ജി, ടിക്ക്ടോക്ക്, ട്രൂകോളര് തുടങ്ങി 89 ആപ്പുകള് നീക്കം ചെയ്യാന് കരസേന സൈനികര്ക്ക് നിര്ദേശം നല്കിയിരുന്നു.
ജൂലൈ 15നുള്ളില് ആപ്പുകള് ഫോണില് നിന്നും നീക്കണമെന്നായിരുന്നു നിര്ദേശം. ഇതിനു പിന്നാലെയാണ് ഉത്തരവ് എല്ലാ സൈനികവിഭാഗങ്ങള്ക്കും ബാധകമാണെന്ന് മന്ത്രാലയം വ്യക്തമാക്കിയത്.