ഡെറാഡൂണ്‍: ഉത്തരാഖണ്ഡ് അതിര്‍ത്തിയില്‍ നേപ്പാള്‍ പോലീസ് സ്ഥാപിച്ച ആറ് ഔട്ട്പോസ്റ്റുകളില്‍ രണ്ടെണ്ണം നീക്കം ചെയ്തു. അതിര്‍ത്തിയില്‍ ദര്‍ചുലയ്ക്ക് സമീപം സ്ഥാപിച്ച ഔട്ട്പോസ്റ്റുകള്‍ കഴിഞ്ഞ ദിവസം നീക്കം ചെയ്തുവെന്ന് ഉദ്യോഗസ്ഥര്‍ സ്ഥിരീകരിച്ചു. ഇന്ത്യാവിരുദ്ധ നിലപാടുകളുടെ പേരില്‍ നേപ്പാള്‍ പ്രധാനമന്ത്രി കെ.പി. ശര്‍മ ഒലി കമ്യുണിസ്റ്റ് പാര്‍ട്ടിയില്‍ ഒറ്റപ്പെട്ടതിനിടെയാണു പുതിയ സംഭവവികാസം.
പിത്തോര്‍ഗഡ് ജില്ലയില്‍ ദര്‍ചുല പട്ടണത്തെ ലിപുലേഖ് ചുരവുമായി ബന്ധിപ്പിക്കുന്ന റോഡ് ഇന്ത്യ തുറന്നത് നേപ്പാളിനെ പ്രകോപിപ്പിച്ചിരുന്നു. തുടര്‍ന്നാണ് ഔട്ട്പോസ്റ്റുകള്‍ സ്ഥാപിച്ചത്. പിത്തോര്‍ഗഡിലെ കാലാപാനി, ലിപുലേഖ്, ലിംപിയാധുര മേഖലകള്‍ തങ്ങളുടേതാണെന്നു നേപ്പാള്‍ അവകാശമുന്നയിച്ചു. ഇവ ഉള്‍പ്പെടുത്തി പുതിയ ഭൂപടവും പുറത്തിറക്കി. നേപ്പാള്‍ പാര്‍ലമെന്‍റ് ഇതിന് അംഗീകാരവും നല്കി. രണ്ട് ഔട്ട്പോസ്റ്റുകള്‍ നീക്കം ചെയ്ത കാര്യം ദര്‍ചുല സബ് ഡിവിഷണല്‍ മജിസ്ട്രേറ്റ് അനില്‍കുമാര്‍ ശുക്ല സ്ഥിരീകരിച്ചു. അതിര്‍ത്തിയോടു ചേര്‍ന്നു ഉക്കു, ബക്ര മേഖലകളിലെ ഔട്ട്പോസ്റ്റുകളാണു നീക്കം ചെയ്തത്. പുതിയതായി സ്ഥാപിച്ച മൂന്ന് ചെക്ക് പോസ്റ്റുകള്‍ കൂടി നീക്കുമെന്നും റിപ്പോര്‍ട്ടുകളുണ്ട്.
