ഡാളസ്: ഡാളസ് കൗണ്ടിയിൽ കോവിഡ് സ്ഥിരീകരിച്ചവരുടെ എണ്ണത്തിൽ ഒരാഴ്ച തുടർച്ചയായി വർധനവ്. ജൂണ് 30ന് മാത്രം രോഗം സ്ഥിരീകരിച്ചവരുടെ എണ്ണത്തിൽ റെക്കോർഡ് വർധനവാണ് റിപ്പോർട്ട് ചെയ്യപ്പെട്ടത്. 601 പേർക്ക് രോഗം സ്ഥിരീകരിക്കുകയും കൂടുതൽ രോഗികളെ ആശുപത്രിയിൽ പ്രവേശിപ്പിക്കുകയും ചെയ്തതായി കൗണ്ടി ജില്ലാ ജഡ്ജി ക്ലെ ജങ്കിംഗ്സ് അറിയിച്ചു.
കുറെനാളുകളായി ഇന്നലെ ഒരൊറ്റ ദിവസം 20 മരണമാണ് റിപ്പോർട്ട് ചെയ്തിരിക്കുന്നത്. കഴിഞ്ഞ ഏഴു ദിവസമായി ശരാശരി 513 കോവിഡ് രോഗികളെ കണ്ടെത്തിയപ്പോൾ ജൂണ് 1 മുതലുള്ള ഏഴു ദിവസം ശരാശരി 209 രോഗികളാണ് ഉണ്ടായിരുന്നതെന്നും അദ്ദേഹം പറഞ്ഞു. ജൂണ് 30 ന് മുൻപ് ഒരു ദിവസം ഏറ്റവും അധികം രോഗം സ്ഥിരീകരിച്ചവരുടെ എണ്ണം 572 ആയിരുന്നു.
ടെക്സസിൽ പൊതുവെ രോഗികളുടെ എണ്ണം ദിവസവും വർധിച്ചു വരുന്ന സാഹചര്യത്തിൽ സംസ്ഥാനാടിസ്ഥാനത്തിൽ ഫെയ്സ് മാസ്ക് നിർബന്ധമാക്കികൊണ്ട് സംസ്ഥാന ഗവണ്മെന്റ് ഉത്തരവിറക്കണമെന്ന് കൗണ്ടി ജഡ്ജി ആവശ്യപ്പെട്ടു. ഡാളസ് കൗണ്ടിയിൽ ഒരൊറ്റ ദിവസം മാത്രം(ജൂണ് 29) ആശുപത്രിയിൽ പ്രവേശിപ്പിച്ച ആകെ രോഗികളുടെ എണ്ണം 619 ആയിരുന്നു.
റിപ്പോർട്ട്: പി.പി. ചെറിയാൻ