ദോഹ: കോവിഡ്-19 വ്യാപനത്തിനെതിരെയുള്ള പ്രതിരോധ നടപടികള്‍ ഊര്‍ജിതമാക്കുന്നതിനാള്‍ രാജ്യത്തെ പള്ളികള്‍ അടഞ്ഞുതന്നെ കിടക്കുമെന്ന് ഔഖാഫ് ഇസ്ലാമികകാര്യ മന്ത്രാലയം അറിയിച്ചു. പള്ളികളില്‍ പ്രാര്‍ഥനകളും ഉണ്ടാകില്ല. എന്നാല്‍ ബാങ്ക് വിളിക്ക് മുടക്കമില്ല.അതേസമയം ഇമാം മുഹമ്മദ് ബിന്‍ അബ്ദുല്‍ വഹാബ് പള്ളിയില്‍ വെള്ളിയാഴ്ചകളില്‍ ജുമുഅ നമസ്കാരം നടക്കും.
റമദാനില്‍ ഇമാമും നാല് പേരുമുള്‍പ്പെടെ ഈ പള്ളിയില്‍ ഇശാ നമസ്കാരവും തറാവീഹ് നമസ്കാരവും നടത്തും. പൊതുജനാരോഗ്യ മന്ത്രാലയത്തിെന്‍റ നിര്‍ദേശങ്ങളും മുന്‍കരുതലുകളും പാലിച്ചായിരിക്കുമിത്. ഗ്രാന്‍ഡ് മസ്ജിദിലെ നമസ്കാരങ്ങള്‍ ഔദ്യോഗിക ടെലിവിഷന്‍, റേഡിയോ വഴി പൊതുജനങ്ങളിലേക്ക് എത്തിക്കും. എന്നാല്‍ ഇത് പിന്തുടര്‍ന്ന് നമസ്കരിക്കാനും പ്രാര്‍ഥിക്കുവാനും അനുവാദമില്ല.
കോവിഡ്-19 പശ്ചാത്തലത്തില്‍ സാഹചര്യങ്ങള്‍ വിലയിരുത്തുന്നതിന് വിവിധ അതോറിറ്റികളുമായി ബന്ധപ്പെടുന്നുണ്ടെന്നും സ്ഥിതി ശാന്തമാകുകയും രോഗം നിയന്ത്രണവിധേയമാകുകയും ചെയ്യുന്നതോടെ എല്ലാ പള്ളികളും പ്രാര്‍ഥനകള്‍ക്കായി തുറന്നുകൊടുക്കുമെന്നും ജനങ്ങളുടെ സുരക്ഷ ഉറപ്പുവരുത്തുകയാണ് പ്രധാനപ്പെട്ടതെന്നും ഔഖാഫ് മന്ത്രാലയം അറിയിച്ചു.
