ന്യൂഡല്‍ഹി: 14 ദിവസത്തിനിടെ രാജ്യത്തെ 23 സംസ്ഥാനങ്ങളിലെ 54 ജില്ലകളില്‍ പുതിയ കോവിഡ് കേസുകള്‍ റിപ്പോര്‍ട്ട് ചെയ്യപ്പെട്ടിട്ടില്ലെന്ന്​ കേന്ദ്ര ആരോഗ്യമന്ത്രാലയം. പുതുച്ചേരിയിലെ മാഹിയിലും കര്‍ണാടകയിലെ കുടകിലും കഴിഞ്ഞ 28 ദിവസത്തിനിടെ ഒരു കോവിഡ് കേസ് പോലും റിപ്പോര്‍ട്ട് ചെയ്തിട്ടില്ലെന്നും കേന്ദ്ര ആരോഗ്യ മന്ത്രാലയം ജോയിന്‍റ്​ സെക്രട്ടറി ലവ്​ അഗര്‍വാള്‍​ വാര്‍ത്താസമ്മേളനത്തില്‍ പറഞ്ഞു.

നിലവില്‍ ചികിത്സയിലുണ്ടായിരുന്ന 2231 പേര്‍ രോഗമുക്തി നേടി. ഇത് രാജ്യത്തെ ആകെ കേസുകളുടെ 14.19 ശതമാനം വരും. 775 പ്രത്യേക ആശുപത്രികളും 1389 പ്രത്യേക ഹെല്‍ത്ത്​ കെയര്‍ സ​െന്‍ററുകളും കോവിഡ്​ രോഗികളെ ചികിത്സിക്കാനായി രാജ്യത്ത് ​സജ്ജീകരിച്ചിട്ടുണ്ടെന്നും അദ്ദേഹം അറിയിച്ചു.

സിനിമ തിയേറ്ററുകള്‍, ഷോപ്പിംഗ് കോംപ്ലക്‌സുകള്‍, മാളുകള്‍, ആരാധനാലയങ്ങള്‍ എന്നിവ ലോക്ക്ഡൗണ്‍ പൂര്‍ത്തിയാവുന്ന മേയ് 3 വരെ അടഞ്ഞു തന്നെ കിടക്കുമെന്ന് ലവ്​ അഗര്‍വാള്‍ വ്യക്തമാക്കി. കോവിഡ് ബാധിതര്‍ അധികമായുളള ഹോട്ട്‌സ്‌പോട്ടുകളില്‍ ഏപ്രില്‍ 20ന് ശേഷവും ഒരു ഇളവും അനുവദിക്കില്ല. അവശ്യസേവനങ്ങള്‍ മാത്രമായിരിക്കും അവിടങ്ങളില്‍ പ്രവര്‍ത്തിക്കുക. ഒാരോ സംസ്ഥാനങ്ങളും അവരുടെ ആരോഗ്യ പ്രവര്‍ത്തകരുടെ സുരക്ഷയുടെ കാര്യത്തില്‍ ​ശ്രദ്ധ ചെലുത്തണമെന്നും മുന്നറിയിപ്പ്​ നല്‍കി.

രാജ്യത്ത്​ നിലവില്‍ 3.86 ലക്ഷം കോവിഡ്​ ടെസ്​റ്റുകള്‍ നടത്തിയതായി ഇന്ത്യന്‍ കൗണ്‍സില്‍ ഒാഫ്​ മെഡിക്കല്‍ റിസേര്‍ച്ച്‌​ അറിയിച്ചിരുന്നു. ശാസ്​ത്രജ്ഞന്‍മാരുടെ 70 ഗ്രൂപ്പുകള്‍ കൊറോണ വാക്​സിന്​ വേണ്ടിയുള്ള പ്രവര്‍ത്തനങ്ങളില്‍ മുഴുകിയിരിക്കുകയാണെന്നും കേന്ദ്ര ആരോഗ്യമന്ത്രാലയം കൂട്ടിച്ചേര്‍ത്തു.