തിരുവനന്തപുരം: ആരോഗ്യവകുപ്പിന്റെ നിബന്ധനകള്‍ പാലിക്കാതെ കൊവിഡ് 19 രോഗലക്ഷണങ്ങളോടെ കറങ്ങി നടക്കുന്നവരെ പിടിക്കാന്‍ കര്‍ശന നടപടി തുടങ്ങി. പൊതുജനങ്ങള്‍ക്ക് തിരുവനന്തപുരം കളക്ടറേറ്റ് കണ്‍ട്രോള്‍ റൂമില്‍ വിവരമറിയിക്കാം. 1077 എന്ന നമ്പറിലാണ് വിളിച്ചറിയിക്കേണ്ടത്. നിരീക്ഷണത്തിലുള്ളവര്‍ പൊതുസ്ഥലങ്ങളില്‍ ഇറങ്ങിനടക്കുന്നത് ശ്രദ്ധയില്‍പ്പെട്ടാല്‍ ഫോട്ടോയെടുത്ത് വാട്‌സാപ്പില്‍ അയയ്ക്കാവുന്നതാണെന്നും ജില്ലാ ഭരണകൂടം അറിയിച്ചു.
ഇന്നും 12 പേര്‍ക്ക് സംസ്ഥാനത്ത് കൊവിഡ് ബാധ സ്ഥിരീകരിച്ചു. ഇതോടെ സംസ്ഥാനത്തെ കൊവിഡ് ബാധിതരുടെ എണ്ണം 52 ആയി. രോഗം വ്യാപിക്കുമോ എന്ന് പറയാനാകില്ലെന്നും കൊവിഡ് ബാധ ഒഴിവാക്കുന്നതിനായി ജാതിമത വ്യത്യാസമില്ലാതെ മനുഷ്യരായി പോരാടണമെന്നും മുഖ്യമന്ത്രി പറഞ്ഞു.
എല്ലാവരും സര്‍ക്കാര്‍ നല്‍കുന്ന നിര്‍ദ്ദേശം പാലിക്കേണ്ടതാണ്. എന്നിട്ടും ചിലര്‍ നിരുത്തരവാദപരമായി പെരുമാറുന്നുണ്ടെന്ന് കാസര്‍കോട്ടെ രോഗബാധിതനെ ഉദാഹരിച്ച്‌ മുഖ്യമന്ത്രി പറഞ്ഞു. രോഗബാധിതന്‍ തന്റെ ഇഷ്ടാനുസരണം എല്ലായിടത്തും പോയി. കാസര്‍കോട് ജില്ലാ ഭരണസംവിധാനം ഇയാളുടെ യാത്രാവിവരം ഭാഗികമായി പ്രസിദ്ധീകരിച്ചു. ഇയാള്‍ പൂര്‍ണമായി സഹകരിക്കുന്നില്ല. ഇയാളെ നിരവധി തവണ ചോദ്യം ചെയ്തിട്ടും അവ്യക്തതയുണ്ട്. കൂടുതല്‍ അന്വേഷണം ആവശ്യമാണ്. ഇത്തരക്കാര്‍ സമൂഹത്തെയാണ് വഞ്ചിക്കുന്നത്. ഇവര്‍ക്കെതിരെ കര്‍ശനമായ നിയമനടപടി സ്വീകരിക്കുമെന്നും മുഖ്യമന്ത്രി പറഞ്ഞിട്ടുണ്ട്.
