കൊവിഡ്-19 (കൊറോണ) വൈറസ് ഭീതിയെ തുടര്‍ന്ന് കാലിഫോര്‍ണിയ തീരത്ത് പിടിച്ചിട്ട കപ്പലിലെ 21 പേര്‍ക്ക് വൈറസ് ബാധ സ്ഥിരീകരിച്ചു. ഇവരില്‍ 19 പേര്‍ ജീവനക്കാരും രണ്ടു പേര്‍ യാത്രക്കാരുമാണ്. വൈസ് പ്രസിഡന്‍റ്പെന്‍സ് ആണ് ഇക്കാര്യം അറിയിച്ചത്.
‘ഗ്രാന്‍ഡ് പ്രിന്‍സസ്’ എന്ന ആഡംബര കപ്പലില്‍ 3500ല്‍പരം ആളുകളുണ്ട്. കൊറോണ മരണത്തെതുടര്‍ന്ന് കാലിഫോര്‍ണിയയില്‍ അടിയന്തരാവസ്ഥ പ്രഖ്യാപിച്ചിരിക്കെയാണ് ഗ്രാന്‍ഡ് പ്രിന്‍സസ് അധികൃതര്‍ക്ക് വെല്ലുവിളിയാകുന്നത്.
വാണിജ്യാടിസ്ഥാനത്തിലുള്ളതല്ലാത്ത തുറമുഖത്തേക്ക് കപ്പല്‍ മാറ്റി കപ്പലിലെ മുഴുവന്‍ ആളുകളെയും പരിശോധിക്കാനും ക്വാറന്‍റൈന്‍ ചെയ്യാനുമാണ് ഇപ്പോള്‍ നീക്കം. കഴിഞ്ഞ മാസം ഇത്തരത്തില്‍ പ്രതിസന്ധി ജപ്പാനും നേരിട്ടിരുന്നു. കൊവിഡ് ഭീതിയില്‍ യോകോഹാമ തുറമുഖത്ത് ‘ഡയമണ്ട് പ്രിന്‍സസ്’ എന്ന കപ്പല്‍ പിടിച്ചിടുകയും കപ്പലിലെ ഇന്ത്യക്കാര്‍ക്കടക്കം വൈറസ് ബാധിക്കുകയും ചെയ്തിരുന്നു.
