കൊച്ചി: കുട്ടനാട് ഉപതെരഞ്ഞെടുപ്പിലെ സ്ഥാനാര്‍ഥിയെ ചൊല്ലി എന്‍സിപിയില്‍ തര്‍ക്കം രൂക്ഷം. സ്ഥാനാര്‍ഥിയായി തോമസ് ചാണ്ടിയുടെ സഹോദരന്‍ തോമസ് കെ. തോമസിന്‍റെ പേര് സംസ്ഥാന അധ്യക്ഷന് ടി.പി.പീതാംബരന്‍ നിര്‍ദ്ദേശിച്ചെങ്കിലും പാര്‍ട്ടിയിലെ ഭൂരിഭാഗവും എതിര്‍പ്പ് ഉന്നയിച്ചു. കൊച്ചിയില്‍ ചേര്‍ന്ന എന്‍സിപി കോര്‍ കമ്മിറ്റി യോഗത്തിലാണ് സംസ്ഥാന അധ്യക്ഷന് പേര് നിര്‍ദ്ദേശിച്ചത്.
തോമസ് കെ. തോമസിനെ സ്ഥാനാര്‍ഥിയാക്കിയാല്‍ പാര്‍ട്ടിയില്‍ കുടുംബാധിപത്യമെന്ന സ്ഥിതിയുണ്ടാകുമെന്നും വര്‍ഷങ്ങളായി പാര്‍ട്ടിക്ക് വേണ്ടി പ്രവര്‍ത്തിക്കുന്നവരെ തഴഞ്ഞെന്ന ദുഷ്പേര് കേള്‍ക്കേണ്ടി വരുമെന്നും ഒരു വിഭാഗം വാദിച്ചു. ഇതോടെ സ്ഥാനാര്‍ഥി ചര്‍ച്ച പ്രാഥമിക ഘട്ടത്തില്‍ തന്നെ തടസപ്പെട്ടു.
സ്ഥാനാര്‍ഥി നിര്‍ണയത്തിനായി എന്‍സിപി കോര്‍ കമ്മിറ്റി യോഗത്തിന് പുറമേ സംസ്ഥാന ഭാരവാഹി, നിര്‍വാഹക സമിതി യോഗങ്ങളും ഇന്ന് ചേര്‍ന്നു. സംസ്ഥാന അധ്യക്ഷന് പുറമേ മന്ത്രി എ.കെ.ശശീന്ദ്രന്‍, മാണി സി. കാപ്പന്‍ എംഎല്‍എ തുടങ്ങിയവും യോഗത്തിനെത്തി.
അതിനിടെ രാവിലെ കൊച്ചി നഗരത്തില്‍ എന്‍സിപി നേതൃത്വത്തിനെതിരേ പോസ്റ്ററുകള്‍ പ്രത്യക്ഷപ്പെട്ടിരുന്നു. “സീറ്റുകള്‍ വില്‍ല്പനയ്ക്ക്’ എന്ന പേരിലാണു പോസ്റ്ററുകള്‍. കുട്ടനാട് സീറ്റുകള്‍ ഉള്‍പ്പെടെ വില്പനയ്ക്ക് എന്ന തലക്കെട്ടോടെ യുവജന കൂട്ടായ്മയുടെ പേരിലാണു പോസ്റ്ററുകള്‍ പ്രത്യക്ഷപ്പെട്ടത്.
ഗുരുവായൂര്‍, കെഎസ്‌എഫഇ, പിഎസ്‌സി, ഗവ. പ്ലീഡര്‍ എന്നിവയുടെ ഒഴിവ് ഉടന്‍ ഉണ്ടാകുമെന്നും മാസപ്പടി കൃത്യമായി കിട്ടിയിരിക്കണമെന്നും മറ്റ് നിരവധി ഒഴിവുകളിലേക്ക് അപേക്ഷ ക്ഷണിക്കുന്നുവെന്നും പോസ്റ്ററുകളില്‍ വ്യക്തമാക്കിയിരുന്നു.
