ന്യൂഡല്ഹി: ഇന്ത്യക്കാര്ക്ക് ഓണ്ലൈനില് ഏറ്റവും ‘പണി’തരുന്ന സെലിബ്രിറ്റി പോര്ച്ചുഗല് ഫുട്ബാള് താരം ക്രിസ്റ്റ്യാനോ റൊണാള്ഡോയാണെന്ന് മെക്കാഫി (McAfee)റിപ്പോര്ട്ട്. കമ്പ്യുട്ടര് സുരക്ഷയുമായി ബന്ധപ്പെട്ട സോഫ്റ്റ്വെയര് നിര്മാതാക്കളായ മെക്കാഫി ഏറെ പഠനത്തിന് ശേഷമാണ് റിപ്പോര്ട്ട് പുറത്തുവിട്ടത്. കാലിഫോര്ണിയ ആസ്ഥാനമായി പ്രവര്ത്തിക്കുന്ന മെക്കാഫി ആന്റി വൈറസ് സോഫ്റ്റ്വെയര് നിര്മാണരംഗത്തും സജ്ജീവമാണ്.
ഇന്റര്നെറ്റില് ഏറ്റവും ദോഷകരവും സിസ്റ്റത്തെ അപായപ്പെടുത്തുന്നതുമായ ലിങ്കുകള് കയറിക്കൂടുന്നത് ക്രിസ്റ്റ്യാനോ റൊണാള്ഡോയുടെ പേര് സെര്ച്ച് ചെയ്യുമ്പോഴെന്നാണ് മെക്കാഫി മുന്നറിയിപ്പ് നല്കുന്നത്. ഈ പേര് സെര്ച്ച് ചെയ്യുമ്പോള് യൂസേഴ്സ് അറിയാതെ കമ്പ്യുട്ടറുകളെ തകരാറിലാക്കുന്ന പ്രോഗ്രാമുകള് ഇന്സ്റ്റാള് ചെയ്യപ്പെടുന്നതായും മെക്കഫേ റിപ്പോര്ട്ടില് പറയുന്നു. ക്രിസ്റ്റ്യനോയുടെ പേരില് പ്രവര്ത്തിക്കുന്ന വ്യാജ ലൈവ് സ്ട്രീമിങ് വെബ്സൈറ്റുകളെക്കുറിച്ചും മെക്കഫേ മുന്നറിയിപ്പ് നല്കുന്നു.
റൊണാള്ഡോ കഴിഞ്ഞാല് ‘അപകടകരമായ’ സെലിബ്രിറ്റി ബോളിവുഡ് നടി തബുവാണ്. ബോളിവുഡ് താരങ്ങളായ തപ്സി പന്നു, സോനാക്ഷി സിന്ഹ, അനുഷ്ക ശര്മ, ഷാരൂഖ് ഖാന്, ഗായകരയായ അര്മാന് മാലിക്, അര്ജിത് സിങ്, സീരിയല് നടി ദിവ്യങ്ക ത്രിപാഠി എന്നിവരും ‘അപകടകരമായ’ സെലിബ്രിറ്റികളില് ആദ്യപത്തിലുണ്ട്.
വ്യാജ സ്ട്രീമിങ് സൈറ്റുകള് ഒഴിവാക്കണമെന്നും ലിങ്കുകള് സൂക്ഷിച്ച് ക്ലിക്ക് ചെയ്യണമെന്നും മെക്കഫേ ഉപദേശിക്കുന്നു.
