പി. പി. ചെറിയാന്
മിഷിഗൺ ∙ യുഎസ് ഡിസ്ട്രിക്റ്റ് കോർട്ട് ഈസ്റ്റേൺ ഡിസ്ട്രിക്റ്റ് ചീഫ് ജഡ്ജിയായി ഇന്ത്യൻ അമേരിക്കൻ വംശജ ഷലിനാ കുമാറിനെ പ്രസിഡന്റ് ബൈഡൻ നോമിനേറ്റ് ചെയ്തു.ജൂൺ 30ന് ബൈഡന്റെ അഞ്ചാമത്തെ റൗണ്ട് നിയമനത്തിലാണു ഷലിനാ കുമാറിനെ കൂടി ഉൾപ്പെടുത്തിയത്.
2007 ൽ ഓക്ക്ലാന്റ് കൗണ്ടി സിക്സ്ത്ത് സർകൂട്ട് കോർട്ട് ജഡ്ജിയായി പ്രവർത്തിച്ചിരുന്നു.2018 ജനുവരിയിൽ മിഷിഗൺ സുപ്രീം കോർട്ട് ഇവരെ സർകൂട്ട് കോർട്ട് ചീഫ് ജഡ്ജിയായും നിയമിച്ചു.ചീഫ് ജഡ്ജിയുടെ ചുമതലകൾക്കു പുറമെ സിവിൽ – ക്രിമിനൽ കേസ്സുകളും വിചാരണ ചെയ്യുന്നതിനു ഇവരെ ചുമതലപ്പെടുത്തിയിരുന്നുവെന്ന് വൈറ്റ് ഹൗസ് പുറത്തുവിട്ട നോമിനേഷൻ വിജ്ഞാപനത്തിൽ വെളിപ്പെടുത്തി.സൗത്ത് ഏഷ്യൻ ബാർ അസോസിയേഷൻ ഓഫ് നോർത്ത് അമേരിക്കാ അംഗമായ ഷലിനാ കുമാർ മിഷിഗൺ സംസ്ഥാനത്തെ സൗത്ത് ഏഷ്യൻ വിഭാഗത്തിൽ നിന്നും നിയമിക്കപ്പെടുന്ന ആദ്യ ഫെഡറൽ ജഡ്ജിയാണ്.
1993 ൽ യൂണിവേഴ്സിറ്റി ഓഫ് മിഷിഗണിൽ നിന്നും ഗ്രാജുവേറ്റ് ചെയ്ത ഇവർ 1996 ൽ യൂണിവേഴ്സിറ്റി ഓഫ് ഡിട്രോയ്റ്റ് – മേഴ്സി സ്കൂൾ ഓഫ് ലോയിൽ നിന്നും നിയമ ബിരുദവും കരസ്ഥമാക്കി.ഫെഡറൽ കോടതി ശക്തമാക്കുന്നതിന്റെ ഭാഗമായി അമേരിക്കയിലെ മറ്റേതു പ്രസിഡന്റുമാർ സ്വീകരിച്ച നടപടികളേക്കാൾ ദ്രുതഗതിയിലാണ് പ്രസിഡന്റ് ബൈഡൻ ജഡ്ജിമാരെ നോമിനേറ്റ് ചെയ്യുന്നത്.
