കൊച്ചി | കൊല്ലം എസ്.എന്‍ കോളജ് സുവര്‍ണ ജൂബിലി ഫണ്ട് തിരിമറി കേസില്‍ എസ്‌എന്‍ഡിപി ജനറല്‍ സെക്രട്ടറി വെള്ളാപ്പള്ളി നടേശന് ചോദ്യം ചെയ്യലിനായി ഹാജരാകാന്‍ ക്രൈം ബ്രാഞ്ച് നോട്ടീസ് നല്‍കി. കേസന്വേഷണം പൂര്‍ത്തീകരിച്ച്‌ റിപ്പോര്‍ട്ട് കൈമാറിയിട്ടും തുടരന്വേഷണം വൈകിയതിന് എതിരെ നല്‍കിയ കോടതിയലക്ഷ്യ ഹര്‍ജി പരിഗണിക്കവെ ഹൈക്കോടതിയിലാണ് ക്രൈം ബ്രാഞ്ച് ഇക്കാര്യം അറിയിച്ചത്.
വെള്ളാപ്പള്ളിയെ ചോദ്യം ചെയ്യാന്‍ നേരത്തെ തീരുമാനിച്ചതാണെന്നും എന്നാല്‍ കൊവിഡ് കാരണം ഇതു നീണ്ടു പോകുകയായിരുന്നുവെന്നും ക്രൈംബ്രാഞ്ച് വ്യക്തമാക്കി. ഉടനെ അദ്ദേഹത്തെ ചോദ്യം ചെയ്യുമെന്നും അന്വേഷണ സംഘം കോടതിയെ ബോധിപ്പിച്ചു.
1997-98 കാലത്ത് കൊല്ലം എസ്‌എന്‍ കോളജിന് ഓഡിറ്റോറിയവും ലൈബ്രറിയും നിര്‍മിക്കാന്‍ എക്‌സിബിഷന്‍ നടത്തിയും പിരിവെടുത്തും സ്വരൂപിച്ച പണം വെള്ളാപ്പള്ളി നടേശന് വകമാറ്റിയെന്നാണ് കേസ്. തിരിമറി പുറത്തുവന്നപ്പോള്‍, കോടതി നിര്‍ദേശപ്രകാരം 2004ല്‍ ആരംഭിച്ച അന്വേഷണമാണ് എത്ര കാലത്തിനു ശേഷം അന്തിമഘട്ടത്തില്‍ എത്തിയത്. കേസില്‍ അടുത്തിടെയാണ് അന്വേഷണ റിപ്പോര്‍ട്ട് ക്രൈംബ്രാഞ്ച് മേധാവിക്ക് സമര്‍പ്പിച്ചത്.
അന്വേഷണം പൂര്‍ത്തിയായതായി സര്‍ക്കാര്‍ ഹൈക്കോടതിയെ അറിയിച്ചിട്ടുണ്ട്. ക്രൈംബ്രാഞ്ച് മേധാവിയുടെ അനുമതി ലഭിച്ചശേഷം തുടര്‍ നടപടികള്‍ ഉണ്ടാവും.
