ന്യൂഡല്‍ഹി: രാജ്യ തലസ്ഥാനത്ത് 24 മണിക്കൂറിനിടെ കോവിഡ് സ്ഥിരീകരിച്ചത് 500ഓളം പേര്‍ക്ക്. പുതുതായി 472 പേര്‍ക്ക് കോവിഡ് സ്ഥിരീകരിച്ചതോടെ ഡല്‍ഹിയിലെ കോവിഡ് ബാധിതരുടെ എണ്ണം 8470 ആയി. ഒരുദിവസം ഇത്രയധികം പേര്‍ക്ക് കോവിഡ് സ്ഥിരീകരിക്കുന്നത് ആദ്യമായാണ്.
കഴിഞ്ഞ 24 മണിക്കൂറിനുള്ളില്‍ മരണം സ്ഥിരീകരിക്കാത്തതും 187പേര്‍ക്ക് രോഗമുക്തി നേടാനായതും ആേരാഗ്യ പ്രവര്‍ത്തകരെയും ഭരണകൂടത്തെയും ആത്മവിശ്വാസത്തിലാക്കുന്നുണ്ട്. ഇതുവരെ 3045 പേരാണ് സംസ്ഥാനത്ത് രോഗമുക്തി നേടിയത്. 115 പേര്‍ മരിക്കുകയും ചെയ്തതായി ഡല്‍ഹി സര്‍ക്കാര്‍ അറിയിച്ചു.
ഡല്‍ഹിയില്‍ ആരോഗ്യപ്രവര്‍ത്തകര്‍ക്ക് പുറമെ പൊലീസുകാര്‍ക്കും കോവിഡ് സ്ഥിരീകരിച്ചിരുന്നു. കഴിഞ്ഞ ദിവസം ഒരു സബ് ഇന്‍സ്പെക്ടര്‍ക്ക് കോവിഡ് പോസിറ്റീവായി. എസ്.ഐക്കൊപ്പം താമസിക്കുന്ന മറ്റു പൊലീസുകാരെയും കൂടെ ജോലി ചെയ്തവരെയും ഇതേ തുടര്‍ന്ന് നിരീക്ഷണത്തിലാക്കി. ഡല്‍ഹിയിലെ ജയിലിലും കോവിഡ് സ്ഥിരീകരിച്ചിട്ടുണ്ട്.
