കൊവിഡ് വാക്സിൻ മുൻഗണനാ പട്ടികയിൽ കൂടുതൽ ആളുകൾ

വളം, കീടനാശിനികൾ വിൽക്കുന്ന കടകൾ ആഴ്ചയിൽ ഒരുദിവസം തുറക്കാം. ചകരിമില്ലുകൾക്ക് കൊവിഡ് മാനദണ്ഡം പാലിച്ച് പ്രവർത്തിക്കാൻ അനുമതി നൽകിയിട്ടുണ്ട്. മത്സ്യബന്ധന തുറമുഖങ്ങൾ ഇന്ന് മുതൽ പ്രവർത്തനം തുടങ്ങി. അവയുടെ പ്രവർത്തനം സുഗമമായി നടത്താൻ ആവശ്യമായ മാർഗനിർദ്ദേശങ്ങൾ നൽകിയിട്ടുണ്ട്. കൊവിഡ് പ്രതിരോധ സാമഗ്രികൾക്ക് സർക്കാർ വില നിശ്ചയിച്ചിട്ടുണ്ട്. എന്നാൽ, ഈ സാധനങ്ങൾക്ക് മെഡിക്കൽ സ്റ്റോറുകളിൽ അടക്കം കൂടിയ വിലയാണ് ഈടാക്കുന്നത്. ഇത്തരം നടപടികൾ കണ്ടെത്താനായി എല്ലാ ജില്ലകളിലും പ്രത്യേക സംഘങ്ങൾ പരിശോധന ആരംഭിച്ചു. കൂടുതൽ വില ഈടാക്കുന്ന സ്ഥാപനങ്ങൾ അടച്ചുപൂട്ടുന്നതടക്കമുള്ള നിയമനടപടികൾ സ്വീകരിക്കാനാണ് നിർദേശം.