അബുദാബി: 13-ാം ഐപിഎല്ലിന്റെ ഉദ്ഘാടന മത്സരത്തില് കണക്കു തീര്ത്ത് ചെന്നൈ സൂപ്പര് കിംഗ്സ്. നിലവിലെ ചാമ്പ്യന്മാരായ മുംബൈ ഇന്ത്യന്സിനെ അഞ്ച് വിക്കറ്റിന് തകര്ത്താണ് കഴിഞ്ഞ വര്ഷത്തെ ഫൈനല് തോല്വിക്ക് ചെന്നൈ പ്രതികാരം ചെയ്തത്. വിരമിക്കല് പ്രഖ്യാപിച്ച മഹേന്ദ്ര സിംഗ് ധോണിയുടെ മടങ്ങി വരവിനും അബുദാബി വേദിയായി.
മറുഭാഗത്ത് ഒരു സമയം വരെ മികച്ച പ്രകടനം പുറത്തെടുത്തെങ്കിലും മുംബൈയ്ക്ക് അവസരങ്ങള് മുതലാക്കാനായില്ല. മുംബൈ നിരയില് ഒരാള് പോലും അര്ദ്ധ സെഞ്ച്വറി കടക്കാതിരുന്ന മത്സരത്തില് സൗരഭ് തിവാരിയായിരുന്നു (42) ടോപ്സ്കോറര്. ഓപ്പണര് ക്വിന്റണ് ഡികോക്ക് 33 റണ്സെടുത്തു. മൂന്നു വിക്കറ്റെടുത്ത ദക്ഷിണാഫ്രിക്കന് പേസര് ലുംഗി എന്ഗിഡിയാണ് ചെന്നൈ ബൗളര്മാരില് മികച്ചുനിന്നത്. ദീപക് ചഹറും രവീന്ദ്ര ജഡേജയും രണ്ടു വിക്കറ്റ് വീതമെടുത്തപ്പോള് ചെന്നൈ ടീമിലെ അരങ്ങേറ്റക്കാരായ പിയൂഷ് ചൗളയും സാം കറനും ഓരോ വിക്കറ്റ് വീതമെടുത്തു.
