തൃശൂർ(Thrissur) ഇരിങ്ങാലക്കുട സ്വദേശിയായ യുവാവിനെ(Irinjalakuda youth) അർമേനിയയിൽ(Armenia) ബന്ദിയാക്കിയതായി(hostage) കുടുംബത്തിന്റെ പരാതി. ഇരിങ്ങാലക്കുട പെരുവല്ലിപ്പാടം സ്വദേശിയായ ചെമ്പിൽ വീട്ടിൽ വിഷ്ണുവിനെയാണ് ബന്ദിയാക്കിയത്. ഇവർ കുടുംബത്തെ ബന്ധപ്പെട്ട് മോചനദ്രവ്യം ആവശ്യപ്പെട്ടു. മകൻ്റെ ജീവൻ ഭീഷണിയിലാണെന്ന് ചൂണ്ടിക്കാട്ടി അമ്മ ഗീത  പരാതി നൽകി. നോർക്ക ഓഫിസിലും, മുഖ്യമന്ത്രിക്കും, സാമൂഹിക നീതിവകുപ്പ് മന്ത്രി ആർ ബിന്ദുവിനുമാണ് പരാതി സമർപ്പിച്ചത്. വിദേശകാര്യ മന്ത്രാലയത്തിനും പരാതി നൽകാനാണ് കുടുംബത്തിന്റെ തീരുമാനം.

കഴിഞ്ഞ ഫെബ്രുവരി 19നാണ് വിഷ്ണു അർമേനിയയിലേക്ക് പോയത്. ഇരിങ്ങാലക്കുട സ്വദേശിയായ ഷാരൂഖ് വഴിയായിരുന്നു വിഷ്ണു അർമേനിയയിലെത്തിയത്. ആറ് ലക്ഷത്തോളം രൂപയായിരുന്നു ഷാരൂഖ് വിസയ്ക്കായി വിഷ്ണുവിനോട് ആവശ്യപ്പെട്ടത്. യാരവൻ എന്ന സ്ഥലത്തെ ഹോസ്റ്റലിലായിരുന്നു വിഷ്ണുവിന് ജോലി. ഷാരൂഖിനൊപ്പം മലയാളികളായ മുഹമ്മദ്, ഷിബു, അമീർ എന്നിവരുമുണ്ടായിരുന്നു. പിന്നീട് ഈ ഹോസ്റ്റലിന്റെ നടത്തിപ്പ് വിഷ്ണുവിന്റെ പേരിലാക്കിയുള്ള സമ്മതപത്രത്തിൽ ഒപ്പിടീപ്പിച്ച് കൂടെയുള്ളവർ സ്ഥലവിടുകയായിരുന്നു. ഭാഷ അറിയാത്തതിനാൽ ഒപ്പിടിപ്പിച്ച രേഖകളിൽ എന്താണെന്നും വിഷ്ണുവിന് അറിയാനായില്ല. 
തുടർന്ന് നടത്താൻ ആളില്ലാതെ സ്ഥാപനത്തിന്റെ പ്രവർത്തനം നിലച്ചതോടെ കെട്ടിട ഉടമ വിഷ്ണുവിനെ പണം ആവശ്യപ്പെട്ട് ബന്ദിയാക്കുകയും ചെയ്തു. ദിവസം 1,20,000 രൂപയാണ് ഇവർ ആവശ്യപ്പെടുന്നത്. തുടർന്ന് നാട്ടിൽ നിന്നും കുടുംബം 1,50,000 രൂപ അയച്ച് കൊടുത്തെങ്കിലും ഇനിയും 3,00000 രൂപകൂടി ഇവർ ആവശ്യപ്പെട്ടുവെന്നും വിഷ്ണുവിന്റെ അമ്മ നൽകിയ പരാതിയിൽ പറയുന്നു. ഇതോടൊപ്പം ഹോസ്റ്റൽ പ്രവർത്തനം നില നിലച്ചതിനാൽ തങ്ങൾക്ക് 30 ലക്ഷം രൂപ തരണമെന്ന് ഷാരൂഖ് അടക്കമുള്ളവർ ആവശ്യപ്പെടുന്നതായും പരാതിയിൽ പറയുന്നു.