ചെന്നൈ : ഇറക്കുമതി ചെയ്ത കാറിന്റെ അധിക നികുതി ഒഴിവാക്കണമെന്ന് ആവശ്യപ്പെട്ട് നടന് വിജയ് വീണ്ടും ഹൈക്കോടതിയില്. പ്രവേശന നികുതിയുടെ പേരില് രജിസ്ട്രേഷന് വൈകിയതില് നടപടി വേണമെന്ന് ആവശ്യപ്പെടുമെന്ന് താരത്തിന്റെ അഭിഭാഷകന് അറിയിച്ചു.
മദ്രാസ് ഹൈക്കോടതി വിജയ്ക്ക് ഒരു ലക്ഷം രൂപ പിഴ ശിക്ഷയായി വിധിച്ചിരുന്നു. ഇറക്കുമതി ചെയ്ത കാറിന് നികുതി ഇളവ് തേടി കോടതിയെ സമീപിച്ച കേസിലായിരുന്നു പിഴ ശിക്ഷ. സിനിമയിലെ സൂപ്പര് ഹീറോ റീല്ഹീറോ ആകരുതെന്നും കോടതി പറഞ്ഞിരുന്നു.
അതേസമയം റീല് ഹീറോ പരാമര്ശം ഏറെ വേദനിപ്പിച്ചുവെന്നും ഇത് പിന്വലിക്കണമെന്നും ചൂണ്ടികാട്ടി മദ്രാസ് ഹൈക്കോടതിയില് അപ്പീല് നല്കുമെന്നും അഭിഭാഷകന് കുമാരേശന് അറിയിച്ചു. നികുതി വെട്ടിപ്പ് നടത്തിയിട്ടില്ല. കൃത്യമായ നികുതി അടയ്ക്കാന് തയ്യാറാണ്. നടപടിക്രമങ്ങള് വൈകിയതാണ് ചോദ്യം ചെയ്തതെന്നും ചൂണ്ടികാട്ടിയാകും അപ്പീല് നല്കുകയെന്നും അഭിഭാഷകന് വ്യക്തമാക്കി.
